Заводчанін адсудзіў у «Гродна Азот» буйную суму

• 12.03.2026, 10:39

Супрацоўнік атрымаў на працы прафесійнае захворванне.

Работнік ААТ «Гродна Азот» атрымаў на працы прафесійнае захворванне і хацеў атрымаць за яго кампенсацыю ад наймальніка. Зрабіць гэта адразу не атрымалася, давялося звяртацца ў суд. Як мужчына выйграў працэс і адсудзіў больш за 19 000 рублёў, піша «Онлайнер» са спасылкай на партал 1prof.by.

Паведамляецца, што работнік звярнуўся да наймальніка па аднаразовую матэрыяльную дапамогу — такую прадугледжвае калектыўны дагавор на прадпрыемстве. Адказнасць завода перад работнікамі была застрахаваная адразу ў дзвюх страхавых кампаніях, але мужчыну не ўдалося атрымаць усе выплаты ў дасудовым парадку. Тады ён звярнуўся ў суд.

Суд Кастрычніцкага раёна Гродна пагадзіўся з яго патрабаваннямі, але адна з дзвюх страхавых падала апеляцыю ў вышэйстаячы суд. Там інтарэсы работніка ўжо прадстаўляў прававы інспектар працы мясцовай прафсаюзнай арганізацыі — ён дамогся таго, каб першае судовае рашэнне засталося ў сіле.

Пасля суда юрыст вывучыў механізм страхавання і падрыхтаваў заяву і поўны пакет дакументаў на выплаты ад другой страхавой кампаніі. Яна прызнала патрабаванні законнымі і выплаціла кампенсацыю.

У выніку работніку за шкоду здароўю ў суме кампенсавалі 19 025 рублёў.