Суд ЕС прыняў рашэнне адносна беларускага бізнесмена Шакутына

• 12.03.2026, 14:32

Рахункі яго літоўскай кампаніі застаюцца замарожанымі.

Суд Еўрапейскага саюза прызнаў абгрунтаваным замарожванне банкаўскіх рахункаў літоўскай кампаніі EM System. Хоць сама фірма не ўнесеная ў санкцыйныя спісы ЕС, палова яе акцый належыць набліжанаму да Лукашэнкі беларускаму бізнесмену Аляксандру Шакутыну, які знаходзіцца пад санкцыямі.

У рашэнні суда падкрэслена, што актывы кампаніі могуць быць заблакаваныя, калі яна кантралюецца асобай з санкцыйнага спісу: «Кантроль над кампаніяй і яе эканамічнымі рэсурсамі мяркуецца, калі асоба з санкцыйнага спісу валодае 50% доляў».

Аляксандр Шакутын трапіў пад санкцыі ЕС 17 снежня 2020 года. Ужо на наступны дзень два літоўскія банкі — SEB і Citadele — замарозілі рахункі EM System, спасылаючыся на тое, што бізнесмен з санкцыйнага спісу валодае паловай кампаніі.

EM System спрабавала аспрэчыць замарожванне ў нацыянальных судах Літвы і дайшла да Вярхоўнага суда. Затым кампанія звярнулася ў Суд ЕС, які пацвердзіў законнасць захадаў.

Суд ЕС таксама адзначыў, што дзяржавы-члены павінны распрацаваць працэдуру, якая дазволіць кампаніям і асобам, не ўнесеным у санкцыйныя спісы, аспрэчваць замарожванне сродкаў.