Беларусы ўзяліся ратаваць французскае кафэ ў Мінску
- 12.03.2026, 14:56
Усяго за паўдня заклік набраў больш за 260 тыс. праглядаў, тысячы лайкаў і бурнае абмеркаванне ў каментарах.
Беларусы ўзяліся ратаваць невялікае кафэ, якое каля года таму ў Мінску адкрыў сапраўдны француз. Нягледзячы на тое, што ўстанова знаходзіцца ў самым цэнтры горада, мае ўласную пякарню і прапануе класічныя французскія дэсерты, уладальнік кафэ кажа, што ледзь трымаецца на плыву, піша «Тэлеграф» .
Неабыякавыя аматары французскай выпечкі вырашылі дапамагчы ўстанове і разгарнулі актыўную прамо-кампанію ў сацсетках.
Нягледзячы на тое, што звычайна пасты ў сацсетках з асабістымі станоўчымі рэкамендацыямі ўстаноў не набіраюць вялікіх ахопаў, гэтым разам заклік адной мінчанкі тэрмінова «ратаваць» французскае кафэ «Bonjour у Себасцьяна» не застаўся незаўважаным. Усяго за паўдня паст у Threads набраў больш за 260 тыс. праглядаў, тысячы лайкаў і бурнае абмеркаванне ў каментарах.
Аўтарка паста пахваліла кафэ за смачнае меню, і, як высветлілася, многія мінчукі ўжо з ім знаёмыя, а хтосьці наогул лічыць круасаны Себасцьяна «літаральна найлепшымі ў горадзе».
Аднак многіх з тых, хто ў гэтым кафэ не бываў, збянтэжылі цэны на выпечку, якія можна разгледзець на здымках, выкладзеных аўтаркай: круасаны каштуюць ад 4,9 да 8,5 рубля, шакаладныя булачкі — ад 6,5 да 9 рублёў. Каву тут можна ўзяць ад 6 да 9 рублёў, а паўлітра гарбаты — за 10 рублёў.
«Цэны на круасаны і шакаладзіны прыкладна ў 2,5 раза вышэйшыя, чым у Парыжы. У Францыі такі бізнес таксама не квітнеў бы», — заўважыў адзін з каментатараў.
Іншыя параўноўвалі цэны ў кавярні з больш таннымі аналагамі з сеткавых крамаў, ігнаруючы той факт, што ў кавярні выпечка свежая, проста з печы, а ў крамах — патокавыя замарожаныя паўфабрыкаты.
«Гатуюць самі з прадуктаў высокай якасці! Вы спрабавалі іх круасаны? Шэдэўр!!! Каб знізіць цэны, трэба рабіць гумовыя круасаны, як усюды. Хочацца, каб хлопцы вытрымалі гэты няпросты перыяд і не пайшлі на ўступкі ў якасці сваёй выпечкі», — адзначыў адзін з удзельнікаў дыскусіі.
Праўда, у большасці каментатараў пытанняў да цэн гэтага канкрэтнага кафэ не было, бо яны блізкія да сярэдніх цэн гэтай катэгорыі ўстаноў.
«Гэта цана за магчымасць паседзець у кафэ. Самы танны фармат — гэта пякарня + кава, даступны кожнаму. За 15 рублёў ты і паеў, і папіў па-за домам. Думаю, проста не ў тым месцы адкрыўся, булачныя жывуць нядрэнна ў параўнанні з іншым грамадскім харчаваннем», — выказаў сваё меркаванне адзін з удзельнікаў абмеркавання.
Менавіта да лакацыі кафэ ў карыстальнікаў Threads узнікла найбольш пытанняў. Хаця адрас кавярні — самы цэнтр горада, насамрэч яна знаходзіцца ў дварах, таму пра яе існаванне не ведаюць нават многія мясцовыя.
Карыстальнікі сацсеткі накідалі ўладальніку варыянты, як выправіць сітуацыю — ад змены лакацыі або хоць бы шыльды, пашырэння асартыменту для прыцягнення студэнтаў (побач знаходзіцца некалькі дзяржаўных ВНУ), арганізацыі тэматычных пасядзелак для творчай моладзі і ўдзелу ў гастрофестах — да актыўнай раскруткі кафэ ў сацсетках. За апошняе, падаецца, беларусы з энтузіязмам і ўзяліся, паабяцаўшы абавязкова заглянуць у кафэ і працягваць раскручваць установу ў сацсетках.
«Я запамятаю і пастараюся прыйсці з'есці круасан, такое двойчы і прасіць не трэба», — напісаў адзін з каментатараў.
«Лакацыю абралі няўдала. Недзе ўнутры двара… але мы знойдзем!! Мы — беларусы! А французы-пекары нам вельмі патрэбныя», — падтрымаў іншы.