ЗША дазволілі Расіі прадаваць нафту з танкераў цягам месяца
- 13.03.2026, 8:34
Дазвол будзе дзейнічаць да 12 красавіка.
ЗША часова вывелі з-пад санкцый продаж расійскай нафты і нафтапрадуктаў, якія былі пагружаныя на судны да 12 сакавіка. Адпаведную ліцэнзію выдала Упраўленне па кантролі за замежнымі актывамі Міністэрства фінансаў ЗША (OFAC).
Дазвол будзе дзейнічаць цягам аднаго месяца — да 12 красавіка. Міністр фінансаў ЗША Скот Бэсэнт удакладніў, што мэта гэтай меры — умацаваць стабільнасць на сусветных энергетычных рынках. Ён таксама падкрэсліў, што часовае зняцце санкцый «не прынясе істотнай фінансавай карысці расійскаму ўраду, які атрымлівае большую частку сваіх энергетычных даходаў з падаткаў, што спаганяюцца на месцы здабычы».
Зняцце абмежаванняў закране каля 100 млн барэляў паліва, адзначыў спецыяльны прадстаўнік прэзідэнта РФ па інвестыцыйна-эканамічным супрацоўніцтве з замежнымі краінамі і кіраўнік РФПІ Кірыл Дзмітрыеў. Пры гэтым, паводле даных Fox News, у транзіце знаходзіцца каля 124 млн барэляў нафты расійскага паходжання. «На фоне нарастаючага энергетычнага крызісу далейшае змякчэнне абмежаванняў на расійскія энергарэсурсы выглядае ўсё больш непазбежным», — напісаў Дзмітрыеў у тэлеграм-канале.
На мінулым тыдні ЗША часова дазволілі Індыі купляць расійскую нафту, якая знаходзіцца ў моры. Пасля размовы з Уладзімірам Пуціным прэзідэнт ЗША Дональд Трамп заявіў, што плануе адмяніць санкцыі супраць нафтавага сектара шэрагу краін, каб стабілізаваць рынак энергарэсурсаў. Пасля гэтага адбылася сустрэча Дзмітрыева са спецпасланнікам амерыканскага прэзідэнта Стывам Уіткафам і яго зяцем Джарэдам Кушнерам у Фларыдзе. Па выніках перамоваў Дзмітрыеў заявіў, што ЗША «пачынаюць лепш разумець ключавую, сістэмаўтваральную ролю расійскай нафты і газу ў забеспячэнні стабільнасці сусветнай эканомікі».
Ваенная аперацыя ЗША і Ізраіля супраць Ірана прывяла да перабояў у пастаўках нафты і рэзкага росту цэн на паліва. У прыватнасці, Тэгеран перакрыў Армузскі праліў, праз які на сусветны рынак паступае каля 20% сусветных паставак нафты і да 30% звадкаванага прыроднага газу (ЗПГ). Корпус вартавых ісламскай рэвалюцыі (КВІР) прыгразіў не дапусціць экспарту «ні літра нафты» з Блізкага Усходу, калі ЗША і Ізраіль працягнуць наносіць удары па Іране.
На гэтым фоне сусветныя цэны на нафту падняліся вышэй за $100 за барэль упершыню з 2022 года. 12 сакавіка больш за 30 краін-членаў Міжнароднага энергетычнага агенцтва (МЭА) прынялі рашэнне вызваліць 400 млн барэляў нафты са стратэгічнага рэзерву для стрымлівання цэн.