«Глядзіце, што сёння адбудзецца»: Трамп паабяцаў ліквідаваць «шаленцаў» пры ўладзе ў Іране

• 13.03.2026, 10:12

Ваенна-марскія і ваенна-паветраныя сілы Тэгерана больш не існуюць.

Прэзідэнт ЗША Дональд Трамп намякнуў на далейшыя ўдары па «шалёных падонках» у Іране.

Пра гэта Трамп напісаў у ўласнай сацсетцы Truth Social.

У сваёй публікацыі Трамп напісаў, што з пачатку канфлікту ваенныя рэсурсы Ірана значна скараціліся.

Паводле яго слоў, ваенна-марскія і ваенна-паветраныя сілы Ірана «больш не існуюць».

Таксама прэзідэнт ЗША сцвярджае, што іранскія ракеты, беспілотнікі і іншыя сродкі былі знішчаныя, а кіраўнікі краіны «зніклі з твару зямлі».

«Мы маем беспрэцэдэнтную агнявую моц, неабмежаваную колькасць боепрыпасаў і шмат часу — глядзіце, што сёння адбудзецца з гэтымі шалёнымі адкідамі. Яны забівалі невінаватых людзей па ўсім свеце на працягу 47 гадоў, а цяпер я, як 47-ы прэзідэнт Злучаных Штатаў Амерыкі, забіваю іх. Які гэта вялікі гонар!», — адзначыў Трамп.

Амерыканскі прэзідэнт таксама абверг інфармацыю газеты The New York Times пра тое, што ЗША не перамагаюць у вайне.

Паводле слоў Трампа, Амерыка знішчае «тэрарыстычны рэжым Ірана» ў ваенным, эканамічным і іншых аспектах.