У Магілёве выявілі «вірус Шродзінгера»

• 13.03.2026, 12:21

Улады спачатку абвясцілі ўспышку, а потым выдалілі паведамленне.

У Магілёве ўзнікла блытаніна вакол паведамленняў пра ўспышку наравіруснай інфекцыі. Некалькі СМІ 10 сакавіка са спасылкай на Магілёўскі абласны цэнтр гігіены, эпідэміялогіі і грамадскага здароўя паведамілі пра рост захваральнасці на наравірус у горадзе і Магілёўскім раёне, заўважыў сайт orsha.eu.

Аднак пазней сітуацыя стала менш яснай. У тэлеграм-канале эпідэміялагічнай службы, на які спасылаліся журналісты, адпаведнае паведамленне зараз адсутнічае. Канал рэгулярна абнаўляецца, але ў тыя дні, калі інфармацыя пачала распаўсюджвацца ў медыя, публікацый няма, што можа сведчыць пра выдаленне запісу.

Пры гэтым раней, 3 сакавіка, у канале з’явілася паведамленне пра ліквідацыю ўспышкі наравіруснай інфекцыі ў адной са школ — Гімназіі №4 Магілёва.

Пазней, 11 сакавіка, кіраўнік эпідэміялагічнай службы апублікаваў відэазварот, у якім заявіў, што ўзровень захваральнасці на наравірус у Магілёве цяпер нават ніжэйшы за звычайны. Гэта заява прагучала ўжо пасля публікацый у СМІ пра магчымую ўспышку.

Такім чынам, застаецца незразумела, ці мела месца новая ўспышка захворвання і наколькі яна была маштабнай. Судзячы з наяўнай інфармацыі, асобныя выпадкі маглі фіксавацца, аднак афіцыйныя структуры не пацвярджаюць сур’ёзнага росту захваральнасці.