У Беларусі абвясцілі штормавое папярэджанне

• 13.03.2026, 14:32

Упершыню за доўгі час.

У пятніцу раніцай, 13 сакавіка, Белгідрамет упершыню за доўгі час абвясціў штормавое папярэджанне. Гаворка не пра вецер або ўраган, а пра гідралагічную небяспеку.

На прытоку Прыпяці — рацэ Пціч каля вёскі Першая Слабадка ў Петрыкаўскім раёне Гомельскай вобласці — узровень вады наблізіўся да небяспечна высокай адзнакі: да крытычнай адзнакі засталося ўсяго 20 см, пры гэтым вада падымаецца прыкладна на 14 см за суткі.

«У бліжэйшыя дні ўзровень вады можа дасягнуць і перавысіць небяспечную адзнаку», — папярэджваюць гідролагі, тлумачачы гэтым прычыну штормавога сігналу.

Акрамя таго, на суботу, 14 сакавіка, сіноптыкі абвясцілі жоўты ўзровень небяспекі з-за магчымай галалёдзіцы ўначы і раніцай месцамі на дарогах.