Лукашэнка пагражае «Арэшнікам» суседнім краінам

• 13.03.2026, 17:36

Кіраўнік у сваіх пагрозах згадаў Кіеў, Варшаву і Вільнюс.

Дыктатар пракаментаваў журналістам заявы з Украіны, што разгорнуты на тэрыторыі Беларусі ракетны комплекс «Арэшнік» НАТА павінна лічыць законнай мэтай.

«Гэта нават не інфапрывод. Гэта самая сапраўдная дурнота, і пра гэта кажуць дурні. Я не кажу, што мы заўтра бахнем гэтым «Арэшнікам» па Вільнюсу, Варшаве або па Кіеву. Не дай Бог. Гэта не наша задача. Нам трэба абараніць сваю краіну. Каб «Арэшнік» не бахнуў, вы да нас не лезьце. Ні з Украіны, ні з Польшчы, ні з Літвы, ні з Латвіі. Давайце па-людску вырашаць пытанні», — сказаў Лукашэнка.

«Няхай лічаць законнай мэтай. Яны ж абураліся, плакалі, цяпер прыціхлі — адносна таго, што я лічу законнай мэтай для Узброеных Сіл Беларусі. Не пагражаю. Каб яны зноў гэта не выхапілі і не пачалі, — заўважыў Лукашэнка. — Вы што, думаеце, калі яны будуць лічыць аб'екты на тэрыторыі Беларусі законнай мэтай, я буду спаць і назіраць. 70 км магу, 200 км. У нас ёсць чым дастаць. Таму я б ім параіў не ляпаць языком і не вякаць. Лічаць «Арэшнік» законнай мэтай — калі ласка».

Нагадаем, прэзідэнт Украіны Уладзімір Зяленскі заявіў, што НАТА варта разглядаць «Арэшнік» у Беларусі як легітымную мэту.