Украінскі эксперт: СБУ выводзіць з ладу ключавыя нафтавыя вузлы РФ
- 13.03.2026, 18:08
Аперацыі СБУ наносяць удар не толькі па ўнутранай лагістыцы, але і па экспартным патэнцыяле Расіі.
Служба бяспекі Украіны выбівае ключавыя нафтавыя вузлы РФ і зніжае магчымасць расіян зарабіць на росце сусветных цэн. Пра гэта піша ў сваім блогу на сайце «Цэнзар.нет» палітолаг, экс-нардэп Вярхоўнай Рады Аляксандр Чарненка, каментуючы ўдары беспілотнікаў Службы па нафтаперакачвальнай станцыі «Ціхарэцк».
Эксперт падкрэслівае, што гэты нафтавы вузел з’яўляецца адным з найбуйнейшых перавалачных пунктаў. «Служба наносіць удары па кропках, дзе сыходзяцца лагістычныя патокі. Бо ўдар па вузле, звязаным з пастаўкамі ў порт Наварасійск, мае геаэканамічнае вымярэнне. Як і ўдалыя атакі на сам порт перад гэтым. Менавіта праз Наварасійск значная частка расійскіх энергарэсурсаў трапляе на сусветныя рынкі. І аперацыі наносяць удар не толькі па ўнутранай лагістыцы, але і па экспартным патэнцыяле Расіі», – лічыць экс-нардэп.
Палітолаг падкрэслівае, што такія ўдары змушаюць Расію ператвараць уласную тэрыторыю ў зону абароны, расцягваючы сістэму супрацьпаветранай абароны і рэсурсы бяспекі на тысячы кіламетраў. «Расія траціць рэсурсы на абарону ўласнай эканомікі. Пасля кожнага такога ўдару Крэмль інвестуе ў абарону нафтабаз, трубаправодаў і партоў, што адцягвае рэсурсы ад фронту. А рэгулярныя ўдалыя атакі падначаленых Яўгена Хмары паказваюць, што нават стратэгічныя аб’екты Расіі не маюць паўнавартаснай абароны», – піша эксперт.
«Служба канчаткова ператварылася ў структуру, здольную сістэмна знішчаць крытычную інфраструктуру праціўніка вельмі далёка ад лініі фронту. Сістэмнае паражэнне нафтавых вузлоў паступова падрывае фінансавую базу вайны, нават ва ўмовах росту сусветных цэн. Паколькі нафта застаецца галоўнай крыніцай даходаў Расіі», – рэзюмуе Чарненка.
Нагадаем, раней стала вядома, што беспілотнікі Цэнтра спецаперацый «Альфа» СБУ паразілі інфраструктуру нафтаперакачвальнай станцыі «Ціхарэцк». Там размешчаны буйная нафтабаза і тэрмінал, якія адыгрываюць важную ролю ў лагістыцы расійскага паліва і нафтапрадуктаў.