Выхадцы з «Альфа» КДБ Беларусі займаюць кіраўнічыя пасады ў звышсакрэтным спецпадраздзяленні РФ
- 13.03.2026, 20:57
Агенты займаюцца палітычнымі забойствамі за мяжой.
Расійскія спецслужбы стварылі новую аўтаномную структуру для ліквідацыі палітычных апанентаў і правядзення дыверсій за мяжой — Цэнтр 795. З падрабязнасцямі знаёміць расследаванне The Insider.
Пасля пачатку паўнамаштабнага ўварвання ва Украіну расійскія ўлады пачалі масава і сістэмна выкарыстоўваць дыверсіі і замахі за мяжой. Паколькі былыя структуры выведкі, у прыватнасці падраздзяленне генерала Андрэя Авер'янава (в/ч 29155), былі сур'ёзна скампраметаваныя пасля шэрагу правалаў і дэананімізацыі афіцэраў у сусветнай прэсе, узнікла патрэба ў новых рэсурсах.
Так, у снежні 2022 года па рашэнні Генштаба РФ узнік Цэнтр 795 (в/ч 75127). Гэта звышсакрэтная і аўтаномная структура задумвалася як больш закрытая альтэрнатыва групам ГРУ для выканання найбольш адказных задач, у тым ліку палітычных забойстваў і выкраданняў, але без сістэмных памылак і «засвечаных» кадраў мінулага.
Як высветліў The Insider, да чэрвеня 2023 года падраздзяленне было амаль поўнасцю ўкамплектаванае. Фармальна «Цэнтр 795» падпарадкоўваецца непасрэдна начальніку Генштаба Валерыю Герасімаву, але аснову складаюць выхадцы з Цэнтра спецыяльнага прызначэння ФСБ (групы «Альфа» і «Вымпел»).
Базай для цэнтра стаў парк «Патрыёт» у Кубінцы, а фінансавую падтрымку забяспечылі кіраўнік «Ростэха» Сяргей Чэмезаў і саўладальнік «Калашнікава» Андрэй Бакарэў. Гэта дазволіла плаціць афіцэрам вельмі высокія заробкі. Так, начальнік упраўлення атрымлівае за месяц каля 5400 долараў толькі ад «Калашнікава», а ёсць яшчэ зарплата ад Міністэрства абароны. Заробкі сілавікоў у Беларусі ў разы меншыя.
Структура Цэнтра 795 уражвае сваёй маштабнасцю. Усяго ў ім служыць каля 500 афіцэраў, якія размеркаваныя на тры ўпраўленні: выведвальнае, штурмавое і баявога забеспячэння.
Выведвальнае ўпраўленне ўключае дзевяць аддзелаў: ад маніторынгу сацсетак і перахопу спадарожнікавай сувязі да агентурных сетак за мяжой (12‑ы аддзел) і снайперскіх груп (19‑ы аддзел), прызначаных менавіта для адрасных ліквідацый. Штурмавое ўпраўленне складаецца з аўтаномных ударных груп, якія не ведаюць пра існаванне адна адной, што гарантуе жыццяздольнасць усёй сеткі пры правале адной ячэйкі. Трэцяе ўпраўленне забяспечвае баявую падтрымку і мае на ўзбраенні найноўшыя танкі Т-90А і рэактыўныя сістэмы «Смерч».
Асаблівае месца ў кіраўніцтве гэтай сакрэтнай структуры займаюць выхадцы з Беларусі. Начальнік штаба Цэнтра 795 Дзмітрый Драздоў і начальнік выведвальнага ўпраўлення Сяргей Радкевіч з'яўляюцца ветэранамі групы «Альфа» КДБ Беларусі.
Іх прыцягненне ў расійскую спецслужбу, як лічаць расследавальнікі, было наўмысным крокам: афіцэры з саюзнай краіны не маюць расійскай інстытуцыянальнай біяграфіі, што дазваляе ім лягчэй пазбягаць увагі замежнай кантравыведкі.
У структуру падраздзялення абодва былі ўведзеныя праз грамадзянскія пасады ў АТ «Калашнікаў», што дапамагло схаваць іх сувязь з расійскімі вайсковымі і афіцыйнымі спецслужбамі. Радкевіч разам са сваім намеснікам Аляксеем Ілюшыным курыруе найбольш закрытыя аддзелы, якія займаюцца агентурнымі сеткамі за мяжой.
Як Google Translate «спаліў» агента
Як адзначаюць расследавальнікі, нягледзячы на высокі ўзровень сакрэтнасці і тэхнічнае аснашчэнне, падраздзяленне сутыкнулася з гучным правалам аднаго са сваіх ключавых выканаўцаў — 42‑гадовага Дзяніса Алімава.
Яго кар'ера пачалася ў стаўрапольскім АМАПе, а працягнулася ў маскоўскай «Альфе» ФСБ. Алімаў меў сувязі на самым высокім узроўні, у тым ліку асабіста з Рамзанам Кадыравым, якому ў 2023 годзе дапамагаў шукаць зніклага пляменніка. У складзе Цэнтра 795 Алімаў займаўся «чэчэнскім напрамкам». Адна з яго задач — выкраданне крытыкаў рэжыму ў Еўропе.
Для правядзення аперацый на тэрыторыі Захаду Алімаву быў патрэбны агент. Ім стаў Дарко Дуровіч, які жыў у Злучаных Штатах. У кастрычніку 2024 года ў рэстаране каля Лубянкі Алімаў перадаў яму 60 тысяч долараў авансу і паабяцаў па 1,5 мільёна долараў за кожную паспяхова «дэпартаваную» мэту. Асноўнымі ахвярамі павінны былі стаць члены сям'і эмігранта з Чачні Ахмеда Закаева, які жыве ў Вялікабрытаніі.
Аднак аперацыя правалілася. Афіцэр Дзяніс Алімаў валодаў толькі рускай мовай. Яго асноўны агент Дарко Дуровіч размаўляў на сербахарвацкай і англійскай. Каб перадаваць аператыўныя інструкцыі і атрымліваць справаздачы, яны выкарыстоўвалі анлайн-сэрвіс Google Translate.
Паколькі сэрвіс належыць амерыканскай кампаніі, ФБР па судовым ордэры атрымала доступ да ўсіх логаў перапіскі. Амерыканскія спецслужбы ў рэжыме рэальнага часу сачылі, як Дуровіч высочваў мэту ў «белай віле каля мора» ў Еўропе і шукаў у інтэрнэце пісталеты Glock.
Дзяніс Алімаў быў затрыманы 24 лютага ў аэрапорце Баготы (Калумбія). Ён прыбыў туды рэйсам Turkish Airlines са Стамбула, выкарыстоўваючы стандартнае аператыўнае прыкрыццё — вобраз турыста з браніраваннем у гатэлі ў Картахене. Затрыманне стала вынікам сумеснай працы Інтэрпола і амерыканскіх спецслужбаў. Алімаву прад'явілі абвінавачанні ў змове з мэтай забойства і падтрымцы тэрарызму, яму пагражае пажыццёвае зняволенне ў ЗША.
Паводле дадзеных The Insider, Цэнтр 795 ужо арганізаваў шэраг замахаў і дыверсій, якія яшчэ расследуюцца. Выданне абяцае распавесці пра іх пазней. Аднак ужо само раскрыццё структуры і дзейнасці гэтага падраздзялення стварае сур'ёзныя праблемы для расійскіх спецслужбаў, асабліва ў сувязі з першым арыштам яго супрацоўніка. Фактычна такі правал ставіць крыж на дзейнасці гэтай структуры.