Фіцо звярнуўся да Зяленскага з адкрытым лістом

• 14.03.2026, 5:42

Прэм’ер Славакіі просіць аднавіць «Дружбу».

Кіраўнікі парламенцкіх партый Славакіі звярнуліся да прэзідэнта Украіны Уладзіміра Зяленскага з лістом, у якім выказалі занепакоенасць з-за спынення транзіту нафты праз тэрыторыю Украіны ў Славакію. Адпаведны ліст апублікаваў у Facebook 13 сакавіка прэм’ер-міністр Славакіі Роберт Фіцо.

Аўтары ліста абвінавацілі Кіеў у нібыта неабгрунтаванай блакіроўцы транспартавання нафты па нафтаправодзе «Дружба», які быў атакаваны РФ. Паводле слоў заяўнікаў, гэта вядзе не толькі да эканамічных страт, але і да сур’ёзных лагістычных праблем для Славакіі, якія параўналі з аднабаковым спыненнем транзіту газу.

Яны адзначаюць, што Славакія мае права і далей атрымліваць расійскую нафту ў межах дзеючых рашэнняў Еўрапейскага Саюза па санкцыях супраць РФ.

Кіраўнікі партый, сярод якіх Фіцо (SMER), Матуш Шутай Эшток (HLAS) і Андрэй Данка (SNS), заклікалі Зяленскага:

як мага хутчэй аднавіць транзіт нафты;

у выпадку пашкоджання нафтаправода «Дружба» дазволіць інспекцыйнай групе Еўракамісіі ацаніць маштаб страт;

прыняць прапановы Еўракамісіі і Славакіі адносна фінансавання і прадастаўлення рамонтных рэсурсаў.

У лісце таксама гаворыцца, што Славакія прыняла больш за 180 тыс. грамадзян Украіны, а славацкія палітыкі выказалі салідарнасць і гатоўнасць падтрымаць далейшую гуманітарную дапамогу і супрацоўніцтва паміж краінамі.

«Мы станоўча ацэньваем вашыя еўрапейскія імкненні і спадзяёмся, што пасля дасягнення справядлівага міру Украіна як наш важны сусед стане стабільнай і квітнеючай краінай. Вашы аднабаковыя рашэнні, якія шкодяць інтарэсам Славацкай Рэспублікі, не спрыяюць гэтаму жаданню», — гаворыцца ў лісце.