Вучыч: Сербія рыхтуецца адбіць уварванне трох суседніх краін

• 14.03.2026, 20:14

У Бялградзе лічаць, што суседзі спяць і бачаць, як бы разам напасці на Сербію.

Сербія рыхтуецца да нібыта магчымай атакі альянсу Харватыі, Албаніі і Косава. Пра гэта ў эфіры сербскага тэлебачання заявіў прэзідэнт краіны Аляксандар Вучыч.

- Мы рыхтуемся да іх нападу. Яны чакаюць моманту ў будучыні, калі разгарэцца больш буйны канфлікт паміж еўрапейцамі і расіянамі, і яшчэ больш буйны — на Блізкім Усходзе. Такія іх намеры, яны чакаюць спрыяльнага моманту, калі ў свеце надыдзе ўсеагульны хаос, – сказаў ён.

Вучыч адзначыў, што сама Сербія не можа прэвентыўна напасці на Албанію і Харватыю, паколькі яны з'яўляюцца сябрамі НАТА. Паводле яго слоў, жыхарам Сербіі няма падставы турбавацца з-за гэтай пагрозы, бо сербская дзяржава «мае дастаткова стрымліўнай сілы», каб не дапусціць замежнага ўварвання.

- Вы можаце спаць спакойна, грамадзяне Сербіі могуць спаць спакойна. Сербія дастаткова моцная, каб захаваць сваю тэрытарыяльную цэласнасць, суверэнітэт, свабоду і бяспеку сваіх грамадзян. Яны не нападзуць на нас не таму, што не хочуць, а таму, што ведаюць, якім будзе адказ, – сказаў ён.