У трох раёнах Беларусі ўстанавілі дні цвярозасці

• 14.03.2026, 22:24

Калі не будуць прадаваць алкаголь?

Раёны Беларусі паступова вызначаюцца з днямі цвярозасці на 2026 год. Даты антыалкагольных акцый устанаўліваюцца мясцовымі «уладамі».

На гэты раз рашэнне прынялі тры раёны Магілёўскай вобласці – Глускі, Быхаўскі і Дрыбінскі. Дакументы апублікаваныя на Нацыянальным прававым партале.

Калі не будуць прадаваць алкаголь

У Глускім раёне выбралі чатыры дні, калі ў продажы не будзе алкаголю: 25 мая, 12 чэрвеня, 1 верасня і 26 лістапада.

На тэрыторыі Быхаўскага раёна алкаголь нельга будзе набыць 23 мая, 12 і 28 чэрвеня, 1 верасня, 26 лістапада.

У Дрыбінскім раёне акцыю «Дзень цвярозасці» правядуць 26 сакавіка, 23 мая, 1 верасня, 26 лістапада. Таксама алкаголь не будуць прадаваць 12 чэрвеня ў сувязі з правядзеннем выпускных вечароў у школах.

Пры гэтым абмежаванне не распаўсюджваецца на продаж алкаголю ў гандлёвых аб'ектах грамадскага харчавання на разліў.