Сакавіцкае цяпло ў Беларусі б’е рэкорды

• 15.03.2026, 11:06

Але наперадзе пахаладанне, снег і свежы вецер.

Мінулы тыдзень прынёс у Беларусь калі не анамальнае, дык дакладна надзвычайнае і даўгачаканае цяпло. Сіноптыкі зафіксавалі новыя сутачныя рэкорды тэмпературы паветра больш чым на палове метэастанцый краіны. Надвор’е пабіла дасягненні мінулых гадоў, у тым ліку і ў сталіцы. Паводле інфармацыі сіноптыкаў, паветра прагравалася да значэнняў, што перавышалі паказчыкі 2023, 2025 і нават 1972 гадоў, піша «Тэлеграф».

Згодна з данымі партала pogodaiklimat.by, рэкордамі адзначыліся як заходнія, так і цэнтральныя і ўсходнія рэгіёны, увогуле ўся краіна. У Брэсце слупкі тэрмометраў падняліся да +17,1°С, што на дзясятую долю вышэй, чым у 2023 годзе. У Высокім таксама зафіксавана +17,1°С. У Гродне паветра прагрэлася да +16,1°С, пабіўшы рэкорд аж 1972 года (+14,0°С). У Мінску тэмпература дасягнула +13,7°С, перавысіўшы паказчык 2023 года (+12,3°С). У Віцебску, Полацку і Сянно таксама абноўлены сутачныя максімумы.

Згодна з данымі «Метеовайб», такая сітуацыя цяпер назіраецца не толькі ў Беларусі, але і ў суседзяў. У той час як на захадзе кантынента (напрыклад, у Бельгіі) месцамі нават утварыўся снежны покрыў, усходняя частка кантынента купаецца ў цяпле з-за «выносу трапічнага паветра».

Так, у Літве нацыянальны сутачны максімум абнаўляецца ўжо трэці дзень запар. Да яе далучылася і Латвія, дзе рэкорды абнавіліся на ўсіх метэастанцыях, а ў польскім Кракаве паветра прагрэлася да +19,4°С.

Спачатку цяпло і першыя дажджы

Нягледзячы на тое, што пік цяпла, магчыма, мінуў, новы тыдзень пачнецца з візіту пагоднага антыцыклона. Вядомы сярод беларусаў тэлесіноптык Дзмітрый Рябоў сцвярджае, што ў панядзелак, 16 сакавіка, у большасці раёнаў ападкаў не чакаецца.

Аднак ёсць і нюанс: паводле слоў Рябова, удзень у крайніх заходніх раёнах пройдуць «першыя хуткія вясновыя дажджы». Уначы і раніцай будзе туман, а бачнасць можа пагаршацца да паўкіламетра. Тэмпература паветра ўначы складзе ад -1°С да +4°С, удзень — ад +9°С на ўсходзе да +14°С на паўднёвым захадзе.

У Белгідрамеце, у сваю чаргу, паведамілі, што 16–17 сакавіка па Рэспубліцы захаваецца ўплыў вобласці павышанага атмасфернага ціску, сфармаванай у цёплай паветранай масе.

У аўторак, 17 сакавіка, усходняя палова краіны ўсё яшчэ будзе знаходзіцца ва ўладзе пагоднага антыцыклона. Згодна з прагнозам, будзе малавоблачна, ападкі малаверагодныя. На захадзе чакаюцца кароткачасовыя дажджы.

Уначы і раніцай у асобных раёнах — слабы туман, які пагоршыць бачнасць да кіламетра. Уначы тэмпература складзе ад -1°С на ўсходзе да +5°С на захадзе, удзень — ад +6°С да +12°С. У цэнтральных раёнах будзе каля +10°С.

Потым «свежы вецер» і пахаладанне

У сераду, 18 сакавіка, надвор’е зменіцца: крыху пахаладае. Як патлумачыў Дзмітрый Рябоў, з паўночнага ўсходу Еўропы падзьме «свежы вецер». Праз воблакі будзе праглядаць сонца, ападкі малаверагодныя. Месцамі туман (бачнасць да паўкіламетра), вільготнасць паветра складзе да 90%. Вецер паўднёвы, умераны. Уначы чакаецца ад -1°С да +4°С, удзень — ад +5°С на паўночным усходзе да +12°С на захадзе.

Папярэдне, у чацвер, 19 сакавіка, асаблівых змен у надвор’і не прадбачыцца. Сіноптыкі абяцаюць пераменную воблачнасць. Уначы і раніцай месцамі туман. На дарогах яшчэ магчымыя слабы галалёд і галалёдзіца. Будзе без ападкаў. Уначы ад -1°С да +3°С, удзень ад +5°С у ўсходніх раёнах да +12°С у заходніх.

Канец тыдня і выхадныя: атмасферны фронт і вяртанне антыцыклона

У пятніцу, 20 сакавіка, характар надвор’я зноў зменіцца. Паводле слоў Рябова, на большай частцы тэрыторыі Беларусі пройдуць кароткачасовыя дажджы. Іх прынясе атмасферны фронт з паўночнага захаду Еўропы. Вецер зменіць напрамак на паўночна-заходні, умераны. Уначы месцамі магчымы непрацяглы туман, вільготнасць паветра будзе высокай. Уначы ад -1°С да +4°С, удзень — ад +6°С у паўночна-заходніх і цэнтральных раёнах да +12°С у паўднёва-ўсходніх.

У выхадныя, 21 і 22 сакавіка, антыцыклон паступова адцісне зону ападкаў на паўднёвы ўсход. У суботу ўначы там магчымы мокры снег, пройдуць невялікія дажджы. Удзень, згодна з прагнозам, ападкаў ужо не будзе. Вецер усходняй чвэрці, умераны, часам парывісты. Вільготнасць паветра можа дасягаць 90%. Уначы ад -2°С да +3°С, удзень ад +9°С па Брэсцкай вобласці да +13°С па Гомельскай вобласці.

У нядзелю, 22 сакавіка, антыцыклон працягне ўтрымліваць спакойнае надвор’е. У большасці раёнаў ападкі малаверагодныя. Уначы і раніцай месцамі чакаецца туман, які можа пагоршыць бачнасць да паўкіламетра. Вільготнасць паветра будзе нізкай. Вецер пераменных напрамкаў, умераны. Уначы ад -2°С да +3°С, удзень — ад +9°С на ўсходзе да +13°С па Брэсцкай і Гродзенскай абласцях.