«Усё вырашыцца ў найбліжэйшыя два тыдні»

• 16.03.2026, 6:00

Ва Украіне вырашаюць, ці патрэбныя ім перамовы з РФ.

Украіна ў найбліжэйшыя адзін-два тыдні плануе канчаткова ацаніць перспектывы перамоваў з Расіяй. Пра гэта, паводле звестак Telegram-канала Ukraine Context, паведаміў дэпутатам кіраўнік фракцыі «Слуга народа» Давід Арахамія.

Паводле яго слоў, калі стане зразумела, што дыпламатычны шлях не дае вынікаў, краіна будзе рыхтавацца да сцэнара зацяжнай вайны з усімі наступствамі, што з гэтага вынікаюць.

Тым часам працэс мірных кантактаў фактычна спыніўся. Як піша Financial Times са спасылкай на чацвярых еўрапейскіх дыпламатаў, увага ЗША значна пераключылася на канфлікт на Блізкім Усходзе, што аслабіла цікавасць Вашынгтона да ўрэгулявання вайны ва Украіне.

Адна з крыніц выдання адзначыла, што перамовы паміж Кіевам і Масквой пры пасярэдніцтве ЗША цяпер знаходзяцца «ў зоне сур'ёзнай рызыкі».