«Аказаліся ідыётамі»: расійскі генерал Івашоў разнёс Пуціна
- 16.03.2026, 8:47
Расія прайграла ў першы дзень «СВА».
Расійскі генерал-палкоўнік, доктар гістарычных навук Леанід Івашоў у інтэрв’ю Republic зноў раскрытыкаваў Пуціна за пачатак вайны супраць Украіны:
— Я як вучоны, як доктар навук, які многія дзесяцігоддзі займаецца гэтай праблематыкай, бачу, што Расія сёння ў параўнанні з Савецкім Саюзам, з Расійскай імперыяй, з Маскоўскім царствам страціла павагу чалавецтва. Гэта проста сорамна, прыніжальна і нават страшна. Калі з 193 краін свету на Генеральнай Асамблеі ААН за нашу пазіцыю выступаюць толькі восем дзяржаў, 73 ўстрымліваюцца, астатнія супраць нас, вось гэта страшнавата…
Сёння на расійскім баку не стаіць ні адна магутная дзяржава. Адзіны наш вайскова-палітычны саюзнік — гэта Беларусь.
«СВА» была развязаная ў супярэчнасці са Статутам ААН.
Нас у акадэміі вучылі, што калі там, уверсе, прымаюцца няправільныя рашэнні, то як бы салдаты ўнізе на тактычным узроўні ні біліся, ні супраціўляліся, усё роўна рашэнні вышэйшага кіраўніцтва перакрэсліваюць усе намаганні ніжэйстаячых войскаў, ніжэйстаячых злучэнняў, падраздзяленняў і гэтак далей. Нам заўсёды выкладчык прыводзіў такі прыклад. Вось трэба фарсіраваць нейкую буйную раку. Але калі уверсе прымаецца рашэнне фарсіраваць не папярок, а ўздоўж, як бы вы там ні плавалі добра, ні біліся добра, вы ўсё роўна не фарсіруеце раку.
Вось і тут, са «СВА», было прынята прынцыпова няправільнае рашэнне. І ў першую чаргу на геапалітычным узроўні. Гэта тое, пра што я і казаў у сваім вядомым звароце. І таму мы не маглі атрымаць вайсковай падтрымкі нават з боку Беларусі…
З аднаго боку, у нас лепшыя ракеты, напрыклад, «Булава», якая дасягае ЗША за столькі-то хвілін, падводныя «Пасейдоны» і гэтак далей. Але з другога — мы пачалі вайну на полі бою, змагаючыся састарэлым узбраеннем, пачынаючы з салдацкага катэлка і заканчваючы браняжылетам. Больш за тое, браняжылеты ў нас былі паралонавыя, з пластыку і гэтак далей. І што ў выніку? Мы атрымалі па сутнасці паразу ў першыя ж дні «СВА».
«Мы аказаліся ідыётамі», — падсумоўвае генерал Івашоў.