ІП з РФ пераехала ў Беларусь і стала «дармаедкай»

• 16.03.2026, 10:28

Расіянку шакавалі законы ў нашай краіне.

Расіянка Ганна Трошына у TikTok распавяла пра сваё жыццё і бізнес у Беларусі, дзе сутыкнулася з нечаканымі патрабаваннямі мясцовага заканадаўства.

Ганна пераехала з Сахаліна ў Беларусь у 2024 годзе разам з сям’ёй: спачатку жыла ў Гродне, а потым асела ў Слоніме, дзе купіла дом. Яна займаецца сеткавым маркетынгам і прадае БАДы кампаніі Siberian Wellness.

Нядаўна жанчына звярнулася ў службу занятасці Слоніма, каб даказаць, што не з’яўляецца дармаедкай. У яе пры сабе былі дакументы аб рэгістрацыі ІП у Расіі.

— «Я не разумею, у чым розніца. Тыя, хто працуе ў Расіі паводле працоўнага дагавора, не лічацца дармаедамі, а ІП — так», — паскардзілася Трошына.

Яна тлумачыла супрацоўніцы службы, што плаціць падаткі і страхавыя ўзносы, і бачыць адзіны спосаб унесці ўклад у эканоміку Беларусі — аформіць самазанятасць, каб не пераплачваць за камунальныя паслугі.