Украіна правяла выпрабаванне аналага ракеты ATACMS

• 16.03.2026, 14:35

Анансаваныя ўдары па РФ.

Украіна прыступае да выпрабавальных удараў новай балістычнай ракетай FP-7 па тэрыторыі Расіі. Пра гэта паведаміў сузаснавальнік украінскай кампаніі-распрацоўшчыцы Fire Point Дзяніс Шцілерман у інтэрв'ю «24 каналу», апублікаваным 15 сакавіка.

Паводле слоў Шцілермана, ракета ўжо прайшла першы этап выпрабаванняў. Відэа з яе пускамі кампанія апублікавала 27 лютага ў сацсетцы X.

Ён адзначыў, што цяпер распрацоўшчыкі пераходзяць да наступнага этапу выпрабаванняў.

«Палёт ужо адбыўся. Цяпер мы пачынаем выпрабаванні на нашых «любімых» суседзях», — сказаў ён.

Новая ракета FP-7, паводле слоў распрацоўшчыка, з'яўляецца аналагам амерыканскай ATACMS, але каштуе прыблізна ўдвая танней. Пры гэтым яе дасяжнасць супастаўная — да 300 км, у залежнасці ад масы баявой часткі.

Шцілерман удакладніў, што ўкраінская ракета менш кампактная, чым амерыканская. Большасць кампанентаў для FP-7 кампанія Fire Point вырабляе самастойна — уключаючы рухавікі і сістэмы кіравання палётам. Выключэннем застаецца баявая частка, якая вырабляецца па асобнай замове.