Беларусам прапанавалі рэгістраваць хатніх жывёл у краме рытуальных тавараў

• 16.03.2026, 14:52

Незвычайная практыка з’явілася ў Жодзіне.

Жыхарка Жодзіна, горада ў Мінскай вобласці, падзялілася гісторыяй. Як і ўсе ўладальнікі хатніх жывёл у 2026 годзе, яна занепакоілася рэгістрацыяй свайго гадаванца ў ЖКГ. Так патрабуе закон, а з лета за адсутнасць рэгістрацыі можна яшчэ і атрымаць штраф, піша Telegraf.news.

Яна звярнулася ў мясцовую камунальную службу, і там ёй далі адрас, куды трэба ісці па даведку. Высветлілася, што гэта крама рытуальных тавараў.

«Добрага дня, беларусы і Беларусь. На мой погляд, гэта «і смешна, і грэшна», але няёмка — гэта дакладна. Малаверагодна, што ў такой атмасферы хочацца рэгістраваць хатніх жывёл — сярод вянкоў і пахавальных крыжоў для людзей. Проста ў іх так у праграме», — распавяла карыстальніца Threads, падзяліўшыся ўлёткай, якую атрымала ў камунальнікаў.

На ёй напісана, што выдачу рэгістрацыйнага пасведчання хатняй жывёлы і жэтона для сабак ажыццяўляе ў краме рытуальных паслуг Жодзінскага ГУП «ОЖКХ» (Дзяржаўнае ўнітарнае прадпрыемства «Аб’яднаная жыллёва-камунальная гаспадарка»).