Германія і Брытанія адмовілі Трампу

• 16.03.2026, 15:34

Краіны не будуць патруляваць Армузскі праліў.

Міністр замежных спраў Германіі Ёган Вадэфуль заявіў, што ягоная краіна не будзе ўдзельнічаць у патруляванні Армузскага праліву, да чаго заклікаў прэзідэнт ЗША Дональд Трамп. Пра гэта паведамляе Tagesschau.

«Мы не будзем удзельнічаць у гэтым канфлікце», — сказаў Вадэфуль.

Паводле яго слоў, ЗША і Ізраіль паведамлялі, што мэта іх атак заключалася ў знішчэнні ваеннага патэнцыялу Ірана, у прыватнасці ядзернай і ракетнай праграм. Германія разлічвае атрымаць інфармацыю аб дасягненні гэтай мэты.

«Тады мы з вялікай ахвотай прымем удзел у перамовах. Толькі шляхам перамоваў можна забяспечыць бяспеку ў Армузскім праліве і Чырвоным моры», — адзначыў ён.

Адносна магчымога пашырэння вайскова-марской місіі ЕС «Аспідэс» у Армузскі праліў, Вадэфуль адзначыў, што «вельмі скептычна» ставіцца да таго, ці зможа яна забяспечыць большы ўзровень бяспекі ў праліве.

Раней стала вядома, што прэм’ер-міністр Вялікабрытаніі Кір Стармер адмовіў Трампу ў накіраванні ваенных караблёў у Армузскі праліў для дапамогі ў яго разблакаванні.