Японія можа накіраваць баявыя караблі ў Пэрсідскі заліў

• Васіль Галоўнін
• 16.03.2026, 16:06

Токіа ўзважвае рызыкоўны крок.

Прэм’ер-міністар Японіі Санаэ Такаіці напярэдадні сваіх вельмі няпростых перамоваў у Вашынгтоне 19 сакавіка з Дональдам Трампам актыўна вывучае пытанне пра тое, ці зможа Токіа накіраваць свае баявыя караблі ў зону Пэрсідскага заліва. Яна паведаміла пра гэта сёння падчас дэбатаў у верхняй палаце парламенту. «Пакуль на гэты конт нічога не вырашана, мы нават не атрымлівалі якой-небудзь просьбы ад ЗША аб накіраванні караблёў», — заявіла прэм’ер.

Аднак сам Трамп раней напісаў у сваёй сацыяльнай сетцы, што чакае ад Кітая, Францыі, Японіі, Паўднёвай Карэі, Вялікабрытаніі і «іншых краін» адпраўкі іх баявых караблёў для забеспячэння свабоды суднаходства ў Армузскім праліве, па якім з зоны Пэрсідскага заліва праходзіць пятая частка сусветнага нафтавага экспарту. Іран заяўляе, што перакрыў трасу; дакладнай інфармацыі на гэты конт няма, аднак рух па праліве фактычна спыніўся.

Ваенная аперацыя ЗША супраць Ірана відавочна ідзе не паводле плану, яна зацягваецца без выразнага выніку, стратэгія выхаду з сітуацыі не праглядаецца. У гэтых умовах Вашынгтон, падаецца, баіцца самастойна ўцягвацца ў ахову танкераў і іншых камерцыйных суднаў у цесным Армузскім праліве, дзе баявыя караблі будуць даволі ўразлівымі для дронаў і ракет. Шырыня трасы ў самым вузкім месцы — усяго 33 кіламетры. Таму ЗША хацелі б уцягнуць ВМС іншых краін у гэтыя рызыкоўныя аперацыі.

У Токіа раней казалі, што нават не думаюць пра накіраванне туды сваіх караблёў. Аднак па меры набліжэння сустрэчы з Трампам прэм’ер Такаіці і дзеячы яе кабінета пачалі рабіць больш прыемныя амерыканцам заявы. Сёння, напрыклад, падчас дэбатаў у парламенте кіраўніца японскага ўрада дапусціла гіпатэтычную магчымасць удзелу ВМС краіны ў расчышчэнні марскіх шляхоў ад мін, у ахове камерцыйных суднаў. Міністр абароны Сіндзіро Коідзумі паведаміў, што такія аперацыі ў прынцыпе дапускаюцца ўнутраным заканадаўствам. Аднак і ён, і прэм’ер агаварыліся, што на гэтым этапе гэта ўсё — «тэарэтычныя разважанні».

Пры гэтым Такаіці як бы між іншым адзначыла, што можа разглядацца толькі пытанне аб ахове звязаных з Японіяй суднаў і іх экіпажаў. Падаецца, што пакуль гэта можа стаць максімальнай саступкай, ад якой Токіа таксама хацела б усімі сіламі ўхіліцца. Дарэчы, у зоне Пэрсідскага заліва цяпер заблакаваныя ад 40 да больш як 50 звязаных з Японіяй танкераў, кантэйнеравозаў і сухагрузаў. Цяжкасці з дакладным вызначэннем гэтай лічбы звязаныя з тым, што нацыянальная прыналежнасць уладальніка судна і кампаніі, якая яго зафрахтавала, часта не супадаюць.

Нежаданне Токіа ўцягвацца ў гэтыя аперацыі тлумачыцца не толькі іх небяспекай, страхам перад стратамі і гібеллю вайскоўцаў. Удары ЗША і Ізраіля па Іране крайне непапулярныя ў Японіі — паводле апублікаваных сёння дадзеных апытання газеты «Асахі», з іх асуджэннем выступаюць 82 адсоткі рэспандэнтаў. Падтрымліваюць амерыкана-ізраільскую аперацыю толькі 9 адсоткаў апытаных. Токіа не можа не ўлічваць настолькі жорсткіх настрояў японскай грамадскай думкі.

Васіль Галоўнін, Telegram