«Ела раз на суткі і баялася выходзіць»
- 16.03.2026, 17:52
Беларуска амаль на два тыдні завязла на Мальдывах з-за адмены рэйсаў.
Беларуска, якая з-за абвастрэння канфлікту на Блізкім Усходзе і масавай адмены рэйсаў завязла на Мальдывах, здолела вярнуцца дадому. Вольга правяла на выспах 16 дзён замест дзевяці і распавяла, як перажыла гэта «незабыўнае падарожжа». «Я баялася выходзіць на вуліцу, ела раз на суткі і скінула 4 кг», — кажа дзяўчына, успамінаючы адпачынак, які лічыла «марай усяго свайго жыцця». Падрабязнасці яе вяртання — у матэрыяле Onlíner.
Што адбылося?
Каротка нагадаем перадгісторыю: Вольга мела адпачываць на Мальдывах з 25 лютага па 5 сакавіка (востраў Маафушы), але з-за сітуацыі на Блізкім Усходзе сутыкнулася з адменай рэйсаў. Тур прадугледжваў вылет з Масквы авіякампаніяй Air Arabia праз Шарджу, назад — па той жа схеме. Але вылет перанеслі спачатку на 12-е, а пасля — на 15 сакавіка, а жыллё спачатку прапанавалі шукаць самастойна. Пазней тураператар усё ж прапанаваў Вользе варыянт пасяліцца да вылету спачатку ў адным, а потым у другім гатэлі. Пры гэтым трэба было пераехаць з курортнага вострава Маафушы на Мале, дзе «нават з дому было небяспечна выходзіць, бо быў Рамадан». А авіякампанія была гатовая аформіць вяртанне сродкаў крэдытным ваўчарам, якім можна скарыстацца на працягу пэўнага тэрміну на набыццё квіткоў Air Arabia.
Гэтыя варыянты Вользе не падышлі: ёй трэба было як мага хутчэй вярнуцца дадому і выйсці на працу. «Калі пісала з просьбай дапамагчы, тураператар Anex (з якім заключаны дагавор) накіроўваў мяне да турагента, а па пытаннях пражывання — у авіякампанію. Дырэктар турагенцтва «360 Трэвел» дапамог скласці звароты ў авіякампанію і Anex, але патлумачыў: яго паўнамоцтвы на гэтым заканчваюцца, усе ключавыя пытанні павінен вырашаць буйны аператар. У чацвер, 5 сакавіка, мяне выселілі з гатэля. Праз Threads мне ўдалося знайсці дзяўчыну з Прагі, якая апынулася ў падобнай сітуацыі. Яна зняла кватэру ў Мале і пусціла мяне пажыць у сябе да 7 сакавіка», — распавядала дзяўчына.
«Ад стрэсу скінула 4 кг»
На момант публікацыі папярэдняга матэрыялу тураператар Anex прапанаваў Вользе правесці адну ноч (6 сакавіка) ў гатэлі Noomoo Huhumale, а з 7 сакавіка — дзве ночы ў гатэлі Amber Sea Side.
Але дзяўчына пабаялася заставацца на востраве Мале і перабралася на лакальны востраў Гурайдо (Guraidhoo), што знаходзіцца за 30 км ад сталіцы Мальдываў. Як і на суседнім Маафушы, тут таксама быў бікіні-пляж, кавярні, крамы, бальніца.
— Гэта было сапраўды незабыўнае падарожжа, — успамінае дзяўчына. — Пра «выжыць на Мальдывах» можна кнігу пісаць. Астатнія дні я жыла за свой кошт, прапанаваны варыянт ад турфірмы для мяне быў небяспечны, заставацца адной у Мале мне было страшна, да таго ж не было ўпэўненасці, што тураператар працягне пражыванне непасрэдна да дня вылету.
Таму праз знаёмых знайшла бюджэтны варыянт на востраве Гурайдо, пра што адразу ж паведаміла турфірме і прапанавала яго аплаціць, але мне адмовілі.
Нагадаем, што каля 2 тыс. долараў на дарогу дадому дзяўчыне сабралі яе сябры і знаёмыя з роднага Дзяржынска. Гэтых грошай, паводле яе слоў, хапіла на пражыванне і каб набыць зваротны авіяквіток.
— Як варыянт мне падказалі мясцовы невялікі гатэль Chambao hotel. Якое ж было маё здзіўленне, калі даведалася, што ягоная гаспадыня Алена — беларуска і што яе дзяцінства прайшло ў Дзяржынскім раёне. Увогуле, сустрэлі мяне з цяплом, клопатам і вельмі смачнай ежай.
Па словах Вольгі, падтрымка зямлячкі шмат у чым дапамагла ёй справіцца і перажыць сітуацыю.
— Раніцай 8 сакавіка я расплакалася, думаючы пра тое, што ў свята засталася без кветак і ўвагі. Прыйшла на сняданак, а там спецыяльна для мяне ўсё ўпрыгожылі кветкамі. Гэта было так міла!
Тым не менш мая трывожнасць пасля стрэсу, здаецца, прабіла космас: пасля Мале, дзе ўсе былі паглынутыя Рамаданам, мне было страшна выходзіць на вуліцу, плюс даводзілася эканоміць кожную капейку, сабраную людзьмі. У крамы, кавярні я заходзіла, можа, пару разоў. Адпаведна, ела ў асноўным раз на суткі. Ад стрэсу і галадоўкі скінула 4 кг. Адпачываць ужо не хацелася, я толькі лічыла дні, калі палечу дадому.
Па словах дзяўчыны, яна запатрабавала ў турфірмы вяртанне сродкаў за чарговы раз адменены рэйс, «але дагэтуль ніякіх лістоў і вяртання не дачакалася». Вярнуцца ў Беларусь яна здолела 12 сакавіка рэйсам «Аэрафлоту» Мале — Шэрамецьева. Авіяквіток быў куплены за грошы, сабраныя зямлякамі. Усяго на пражыванне і дарогу назад у дзяўчыны пайшло каля 1700 долараў.
— У мяне застаўся асадак ад таго, як арганізатары тура паставіліся да маёй сітуацыі. Калі б яны 28 лютага не пачалі пераконваць, што мы паляцім назад 5 сакавіка, я змагла б купіць квіткі значна танней і быць дома своечасова. У выніку летала дадому ўдвая даражэй, і мне пакуль нават грошы за тыя квіткі не вярнулі.
Паколькі тураператар першапачаткова не працягнуў Вользе пражыванне ў гатэлі і не даставіў яе дадому, Вольга накіравала дасудовую прэтэнзію ў адрас Anex.