Ва Украіне стварылі працоўную групу па аэрапортах

• 17.03.2026, 4:32

Крок да адкрыцця неба?

Урад Украіны стварыў працоўную групу па падрыхтоўцы да аднаўлення працы аэрапортаў.

Пра гэта паведамляе РБК-Украіна са спасылкай на адпаведны загад Мінразвіцця.

«Стварыць працоўную групу па падрыхтоўцы да аднаўлення функцыянавання аэрапортаў Украіны, зацвердзіць яе палажэнні і склад», — сказана ў загадзе.

У Мінразвіцця ў каментары журналістам удакладнілі, што пакуль паветраная прастора застаецца закрытай з-за сітуацыі з бяспекай. Аднак прыярытэтам з'яўляецца захаванне інфраструктуры аэрапортаў, каб пачаць палёты максімальна хутка, як толькі гэта стане магчымым.

Каардынацыя дзеянняў: орган будзе працаваць на міжведамасным узроўні для стварэння ўмоў бяспечнага аднаўлення палётаў пасля адкрыцця неба.

Практычныя рэкамендацыі: спецыялісты выпрацуюць план паэтапнага аднаўлення працы аэрапортаў.

Бяспека інфраструктуры: асаблівая ўвага будзе надавацца ахове авіяцыйнай інфраструктуры і бяспецы грамадзянскай авіяцыі як падчас ваеннага становішча, так і пасля яго завяршэння.

Варта адзначыць, што паветраная прастора Украіны закрытая з пачатку поўнамаштабнага ўварвання расіян.