Гродна захапілі чайкі

• 17.03.2026, 9:53

Камунальнікі не спраўляюцца.

У Гродне камунальныя службы паскардзіліся на нашэсце чаек і звярнуліся па дапамогу да вучоных, піша мясцовая газета «Перспектыва».

Камунальнікі заключылі дамову з факультэтам біялогіі і экалогіі Гродзенскага дзяржаўнага ўніверсітэта імя Янкі Купалы для вызначэння месцаў пражывання птушак і распрацоўкі рэкамендацый па іх выцясненні з гарадскога асяроддзя.

У ходзе абследавання былі вывучаныя 14 шматпавярховых дамоў у мікрараёнах Дзевятоўка, Альшанка і на праспекце Касманаўтаў. Асабліва шмат чаек аказалася ў раёне вуліцы Паповіча, дзе летам выводзіліся птушаняты, а восенню птушкі паляцелі на поўдзень.

Навукоўцы прапанавалі некалькі спосабаў барацьбы з птушкамі: прыбіранне смецця і імху з дахаў, усталяванне агароджаў, закрыццё смеццевых кантэйнераў з мадэрнізаванымі крышкамі, а таксама выкарыстанне адпужвальных прылад.

Паведамляецца, што камунальныя службы ўжо атрымалі дазвол на выкарыстанне ультрагукавых адпужвальнікаў.