Пуцін мог заплаціць Кім Чэн Ыну $14 мільярдаў

• 17.03.2026, 14:17

Гэта цана за ўдзел войскаў КНДР у вайне супраць Украіны.

Паўночная Карэя магла атрымаць да $14,4 млрд дзякуючы накіраванню вайскоўцаў і пастаўкам узбраенняў Расіі падчас вайны з Украінай. Пра гэта гаворыцца ў дакладзе Інстытута стратэгіі нацыянальнай бяспекі (INSS).

«Калі Паўночная Карэя поўнасцю атрымае аплату за ўдзел сваіх войскаў і экспарт узбраенняў, гэта падарве ключавы эфект санкцый — абмежаванне прыцёку валютнай выручкі», — адзначаецца ў даследаванні. Паводле дадзеных дакладу, з кастрычніка 2024 года Пхеньян як мінімум чатыры разы накіроўваў вайсковыя кантынгенты, агульная колькасць вайскоўцаў перавысіла 20 тыс. чалавек. У перыяд з жніўня 2023 года па снежань 2025 года даходы ад экспарту ўзбраенняў і ўдзелу ў вайне маглі скласці ад $7,67 млрд да $14,4 млрд. Прамыя даходы ад накіравання вайскоўцаў, уключаючы заробкі і кампенсацыі ў выпадку гібелі, ацэньваюцца ў $620 млн у год.

Аўтар даследавання адзначае, што гэтыя ацэнкі заснаваныя толькі на даступных дадзеных з адкрытых крыніц. «З высокай верагоднасцю Паўночная Карэя атрымае дадатковую кампенсацыю ў выглядзе ваенных тэхналогій, высокадакладных кампанентаў і матэрыялаў, якія складаней зафіксаваць публічна», — гаворыцца ў дакладзе.

Гэтыя даходы аказваюць прыкметны ўплыў на эканоміку КНДР, дзе мілітарызацыя стала фактарам росту. Паводле дадзеных Банка Карэі, ВУП Паўночнай Карэі ў 2024 годзе павялічыўся на 3,7% дзякуючы пашырэнню эканамічных сувязяў з Расіяй і росту ваеннай вытворчасці. Паказчык стаў максімальным з 2016 года. Улады КНДР афіцыйную статыстыку не публікуюць.