Для рынку працы хочуць увесці ўжорстчанні

• 17.03.2026, 17:35

Працаўнікам гэтыя ідэі наўрад ці спадабаюцца.

Дэфіцыт кадраў у Беларусі ўзмацняецца. На гэтым фоне бізнес прапануе ужорстчыць правілы для супрацоўнікаў, якія сыходзяць да канкурэнтаў. Пра гэта паведамляецца на сайце Савета па развіцці прадпрымальніцтва.

Адной з вострых праблем у прамысловасці называюць дэфіцыт кадраў. Патрэба ў кадрах прыкметна вырасла: калі на пачатку 2021-га яна была на ўзроўні 72 тыс., то на 1 верасня 2025-га — 193,8 тыс. Пры гэтым у дзяржаўнай праграме «Збалансаваны рынак працы» на 2026–2030 гады прапісалі, што ў бліжэйшую пяцігодку эканоміцы спатрэбіцца больш за 300 тыс. работнікаў.

На фоне ўзмацнення канкурэнцыі за работнікаў кампаніі ўсё больш укладаюць у навучанне вузкіх спецыялістаў, развіццё ўнікальных навыкаў і ўласных тэхналогій. У гэтых умовах узнікае неабходнасць у прававых механізмах, якія абароняць такія ўкладанні і абмяжуюць пераманьванне ключавых супрацоўнікаў канкурэнтамі, лічыць генеральны дырэктар прадпрыемства «Компо» Валянцін Пікуль. Праблема ў тым, што некаторыя супрацоўнікі, сыходзячы працаваць у іншую фірму, «нясуць» з сабой «неадчужальныя веды, навыкі, кампетэнцыі і прафесійныя сувязі, набытыя за кошт наймальніка».

Пікуль прапанаваў укараніць у заканадаўства Беларусі пяць змяненняў. Перш за ўсё прапануецца дазволіць кампаніям заключаць з супрацоўнікамі пагадненні аб неканкурэнцыі і прапісаць гэта ў Працоўным кодэксе. Ідзе пра работнікаў з доступам да камерцыйнай таямніцы і ключавых тэхналогій.

Акрамя таго, прадстаўнік бізнесу выступае за тое, каб на заканадаўчым узроўні ўвесці забарону для ключавых супрацоўнікаў пасля звальнення перацягваць за сабой былых калег і кліентаў. То бок замацаваць інстытут пагадненняў аб непераманьванні.

Трэцяе — гэта прапісаць правілы, паводле якіх кампаніі змогуць дамаўляцца не пераманьваць супрацоўнікаў адна ў адной. Напрыклад, у межах сумесных праектаў з улікам антыманапольных абмежаванняў.

Таксама сярод прапаноў — даць кампаніям права праз суд часова забараняць былым супрацоўнікам працаваць у прамых канкурэнтаў, калі ёсць рызыка, што яны будуць выкарыстоўваць былыя камерцыйныя сакрэты і тэхналогіі.

І пятае: праз суд забараняць магчымае разгалошванне камерцыйнай таямніцы. То бок прымаць такое рашэнне яшчэ да таго, як верагоднае яе разгалошванне адбылося, — калі ёсць такая рызыка пры звальненні супрацоўніка.

Прадстаўнік бізнес-супольнасці лічыць, што гэта дазволіць кампаніям абараніць укладанні ў супрацоўнікаў, знізіць рызыку ўцечкі ведаў і тэхналогій, а таксама «ліквідуе дэструктыўную канкурэнцыю за кадры».