Кіраўнік контртэрарыстычнага цэнтра ЗША Джо Кент падаў у адстаўку

• 17.03.2026, 19:09

У знак пратэсту супраць вайны з Іранам.

Кіраўнік Нацыянальнага контртэрарыстычнага цэнтра ЗША Джо Кент падаў у адстаўку, заяўіўшы, што прычынай такога рашэння стала вайна супраць Ірана, піша ВВС.

45-гадовы Кент, які каардынаваў у адміністрацыі Дональда Трампа барацьбу з тэрарызмам, заклікаў Белы дом «змяніць курс».

Джо Кент быў членам каманды Трампа, яго кандыдатуру на пасаду кіраўніка Нацыянальнага контртэрарыстычнага цэнтра Сенат ЗША зацвердзіў летась у ліпені.

«Іран не ўяўляў непасрэднай пагрозы для нашай краіны, і цалкам ясна, што мы пачалі гэтую вайну пад ціскам з боку Ізраіля і яго магутнага лабі ў Амерыцы», — заявіў Кент, звяртаючыся праз сацсеткі да прэзідэнта.

«Да чэрвеня 2025 года вы разумелі, што войны на Блізкім Усходзе — гэта пастка, у якой Амерыка губляла каштоўныя жыцці нашых патрыётаў і ахвяравала багаццем і дабрабытам краіны, — працягнуў Кент. — Як ветэран, які 11 разоў удзельнічаў у баявых дзеяннях, і муж кавалера Залатой Зоркі, што страціў каханую жонку Шэнан у вайне, развязанай Ізраілем, я не магу падтрымаць адпраўку новага пакалення на смерць у вайне, якая не прыносіць ніякай карысці народу Амерыкі».

Кент — ветэран сіл спецыяльнага прызначэння ЦРУ. Ягоная жонка Шэнан Кент, якая служыла ў ваенна-марскіх сілах крыптолагам, у 2019 годзе загінула ў Сірыі ў выніку нападу смяротніка.

Кент таксама сцвярджае, што «высокапастаўленыя ізраільскія чыноўнікі» і ўплывовыя амерыканскія журналісты распаўсюджвалі «дэзінфармацыю», якая падарвала палітыку адміністрацыі Трампа «Амерыка перш за ўсё».