Патрыярха Грузіі Ілію II увялі ў штучную кому

• 17.03.2026, 19:11

Ён падключаны да ШВЛ.

Каталікоса-патрыярха Грузіі Ілію II (у свеце Іраклі Георгіевіч Гудушаўры-Шыолашвілі) гаспіталізавалі ў Каўказскі медыцынскі цэнтр у Тбілісі з-за раптоўнага пагаршэння самаадчування, паведаміла прэс-служба патрыярхату ў сацыяльнай сетцы Facebook.

Патрыярха гаспіталізавалі ў ноч на 17 сакавіка са страўнікавым крывацёкам. Пацыент знаходзіцца ў рэанімацыі, падключаны да ШВЛ і ўведзены ў штучную кому.

Па словах дырэктара цэнтра Софіо Аспанідзэ, стан 93-гадовага патрыярха застаецца цяжкім.

«Пацыенту кожную гадзіну праводзяцца аналізы. Паказчыкі дагэтуль патрабуюць увагі. Гемадынаміка не змянілася», — цытуе агенцтва словы Аспанідзэ.

Міністр аховы здароўя Грузіі Міхаіл Сарджвеладзэ заявіў, што лячэнне каталікоса-патрыярха Іліі II праводзіцца карэктна і не мае альтэрнатывы. Ён адзначыў, што такое заключэнне зроблена па выніках скліканага ў цэнтры кансіліуму. Па словах Сарджвеладзэ, пазітыўная дынаміка залежыць ад рэакцыі арганізма з улікам узросту.

У 2017 годзе патрыярха Грузіі прааперавалі ў Германіі пасля выяўненага ў яго запалення жоўцевай бурбалкі.

Ілія II нарадзіўся ў 1933 годзе. Патрыярх узначальвае Грузінскую Праваслаўную Царкву з 1977 года. Пры ім колькасць епархій у краіне вырасла да 42, а колькасць дзеючых храмаў — з 48 да прыкладна 1 тыс. Таксама пры Іліі II у Тбілісі ўзвялі найбольшы храм у Грузіі — Патрыяршы сабор Святой Тройцы.