Колькасць спадарожнікаў Starlink на арбіце перавысіла 10 тысяч

• 17.03.2026, 21:06

Першы запуск спадарожнікаў адбыўся амаль сем гадоў таму.

Памер касмічнай групоўкі спадарожнікаў Starlink на нізкай навакалязямнай арбіце ўпершыню перавысіў 10 тыс. апаратаў праз амаль сем гадоў пасля запуску першай партыі, паведамляе Spaceflight Now.

Кампанія SpaceX ажыццявіла запуск у ноч на 17 сакавіка з базы Касмічных сіл ЗША Вандэнберг у Каліфорніі. Ракета Falcon 9 вывела на арбіту чарговую партыю з 25 спадарожнікаў. Гэта быў 17-ы арбітальны запуск з гэтай пляцоўкі з пачатку 2026 года.

Для місіі выкарыстоўвалася першая ступень Falcon 9 з заводскім нумарам B1088. Гэты палёт стаў для яе 14-м. Раней ступень ужо выкарыстоўвалася для запуску навуковай місіі NASA, а таксама для вываду на арбіту спадарожнікаў Нацыянальнага разведвальнага ўпраўлення і дзевяці папярэдніх партый Starlink.

Пасля аддзялення ступень здзейсніла пасадку на беспілотную платформу ў Ціхім акіяне. Гэта была 586-я паспяховая пасадка першай ступені ў гісторыі кампаніі.

Сярэдняя перыядычнасць запускаў SpaceX у 2026 годзе складае адзін раз у 2-3 дні. З 33 запускаў Falcon 9 з пачатку года 26 былі прысвечаныя вываду спадарожнікаў Starlink.

Паводле дадзеных кампаніі на люты 2026 года, сэрвісам Starlink карыстаюцца больш за 10 млн актыўных кліентаў у 160 краінах. У сакавіку кампанія актывавала сувязь у Ніуэ, Кувейце і Цэнтральна-Афрыканскай Рэспубліцы.