Ізраіль ліквідаваў міністра разведкі Ірана

• 18.03.2026, 14:26

Ісмаіл Хатіб — адна з ключавых постацей рэжыму аятолаў.

Міністр абароны Ізраіля Ісраэль Кац паведаміў, што ў ноч на 18 сакавіка ў Тэгеране быў забіты кіраўнік іранскай разведкі Ісмаіл Хатіб.

Хатіб узначальваў Міністэрства разведкі Ірана з 2021 года і ўваходзіў у бліжэйшае атачэнне вышэйшага кіраўніцтва краіны. Раней ён займаў ключавыя пасады ў сілавых структурах, судовай сістэме і апараце Вярхоўнага лідэра.

Пад яго кіраўніцтвам ведамства займалася як падаўленнем унутранай апазіцыі, так і замежнымі аперацыямі супраць Ізраіля і заходніх краін.

Хатіб лічыўся адным з ключавых функцыянераў рэжыму і меў цесныя сувязі з Маджтабой Хаменеі.

Раней ЗША прапанавалі ўзнагароду ў 10 мільёнаў долараў за яго затрыманне або ліквідацыю. Афіцыйны Тэгеран пакуль не даў каментарыяў з гэтай нагоды.