Польшча мадэрнізуе пункт пропуску «Кузьніца» на мяжы з Беларуссю

• 18.03.2026, 20:34

Праз яго змогуць прапускаць грузавікі.

Польшча мадэрнізуе пункт пропуску «Кузьніца» («Брузгі») на мяжы з Беларуссю да 16 снежня 2026 года. Праект дазволіць аднавіць рух грузавога аўтамабільнага транспарту паміж дзвюма краінамі праз гэты памежны пераход. Пра работы расказаў на прэс-канферэнцыі ваявода Падляскага ваяводства Яцэк Бжозоўскі, звярнуў увагу Most.

З 17 лістапада 2025 года, калі Польшча адкрыла два пункты пропуску на мяжы з Беларуссю, «Кузьніца» запрацавала толькі для легкавога транспарту. Для грузавых аўтамабіляў і аўтобусаў гэты пункт пропуску пакуль закрыты.

Па словах ваяводы, выканаўца работ павінен быць вызначаны да канца сакавіка 2026 года. А да 16 снежня інвестпраект павінен быць уведзены ў эксплуатацыю.

У напрамку выезду з Польшчы будзе пяць палос: адна — для службовага транспарту, дзве — для легкавых аўтамабіляў і аўтобусаў і дзве — для грузавога транспарту.

На ўезд у Польшчу будзе яшчэ дзве паласы для ўсіх тыпаў транспартных сродкаў. Таксама з'явіцца двухпалоснае кольца.

Яцэк Бжозоўскі падкрэсліў, што рэалізацыя праекта дазволіць злучыць пераход з трасай S19 і аднавіць праезд грузавога транспарту ў абодва бакі, «калі будзе такое рашэнне кіраўніка Савета Міністраў і міністра фінансаў».

Праект таксама прадугледжвае будаўніцтва буфернай стаянкі прыкладна на 800 аўтамабіляў, на якой мытная адміністрацыя арганізуе сістэму чаргі да пераходу.