ФРС ЗША пакінула базавую стаўку без змяненняў

• 18.03.2026, 22:13

Другі раз запар.

Федэральная рэзервовая сістэма (ФРС) ЗША, якая выконвае функцыі цэнтральнага банка краіны, па выніках дзвюхдзённага пасяджэння пакінула базавую працэнтную стаўку на ўзроўні 3,5–3,75% гадавых. Адпаведную інфармацыю 18 сакавіка апублікавалі на афіцыйным сайце амерыканскага рэгулятара.

«Камітэт вырашыў захаваць мэтавы дыяпазон стаўкі федэральных фондаў на ўзроўні ад 3,5 да 3,75%», — гаворыцца ў тэксце заявы.

Акрамя таго, у ФРС адзначылі, што ўзровень беспрацоўя за апошнія некалькі месяцаў не змяніўся, а інфляцыя застаецца «крыху павышанай». Пры гэтым у рэгулятары падкрэслілі імкненне да дасягнення ўзроўню інфляцыі ў 2%.

Каментуючы сітуацыю на Блізкім Усходзе, у ФРС ахарактарызавалі яе як нявызначаную для эканомікі Злучаных Штатаў.