СБУ затрымала лукашэнкаўскага агента

• 19.03.2026, 13:52

Ён працаваў і на ФСБ РФ.

Ваенная контрвыведка Службы бяспекі Украіны паведаміла пра затрыманне вайскоўца ЗСУ, які, як сцвярджаецца, быў агентам, што адначасова працаваў на ФСБ Расіі і лукашэнкаўскую разведку памежнай службы.

«Паводле матэрыялаў справы, зламыснікам аказаўся вайсковец з падраздзялення Сіл беспілотных сістэм. Так, займаючы пасаду аператара БПЛА, ён «зліваў» ворагу дадзеныя пра напрамкі руху, віды і колькасць дронаў Сіл абароны, задзейнічаных у баях на паўночна-ўсходнім прыграніччы», — гаворыцца ў паведамленні СБУ.

У сілавым ведамстве сцвярджаюць, што пазней падазраваны перавёўся на пасаду аператара наземных робатызаваных комплексаў на Ізюмскім кірунку і пачаў збіраць дадзеныя пра дыслакацыю і баявыя планы падраздзяленняў ЗСУ, што знаходзяцца тут.

«Пасля выканання агентурных задач фігурант спадзяваўся ўцячы ў Расію праз лінію фронту, дзе яго павінны былі сустракаць расійскія спецслужбы», — у СБУ сцвярджаюць, што «варожы „крэт“ быў затрыманы па месцы яго знаходжання на Харкаўшчыне».

Яму паведамілі пра падазрэнне паводле артыкула аб дзяржаўнай здрадзе ў умовах ваеннага становішча.

«Зламыснік знаходзіцца пад вартай без права ўнясення закладу. Яму пагражае пажыццёвае пазбаўленне волі з канфіскацыяй маёмасці», — удакладнілі ў СБУ.