Politico: Орбан перасёк «чырвоную лінію» ЕС, пасля выбараў яго чакае расплата

• 19.03.2026, 14:01

Пра маючую адбыцца расплату для Будапешта заявілі пяць дыпламатаў ЕС і міністр урада.

Венгерскі прэм’ер Віктар Орбан заблакаваў крэдыт для Украіны на 90 мільярдаў еўра, які сам жа ўхваліў у снежні, - і гэтым перасёк мяжу, за якой ЕС больш маўчаць не будзе.

Пра гэта паведамляе Politico.

Саміт лідараў ЕС у Бруселі ў чацвер можа стаць для Орбана апошнім - у красавіку яго чакаюць выбары, дзе ён саступае апаненту.

Пра маючую адбыцца расплату для Будапешта заявілі пяць дыпламатаў ЕС і міністр урада адной з краін блока.

Міністр замежных спраў Германіі Ёган Вадэфуль на закрытай сустрэчы наўпрост папярэдзіў: абструкцыянізм Будапешта больш нельга цярпець. Іншыя міністры выказаліся яшчэ больш жорстка.

«Прэм’ер-міністр Орбан павінен зразумець, што ён пастаянна выпрабоўвае межы таго, што іншыя дзяржавы-члены гатовыя цярпець», - заявіў адзін з дыпламатаў ЕС.

Швецыя ўжо адкрыта заявіла пра гатоўнасць разгледзець артыкул 7 Дагавора аб ЕС - механізм пазбаўлення Венгрыі права голасу.

Што будзе далей

Рэальныя наступствы залежаць ад вынікаў выбараў 12 красавіка. Калі пераможа супернік Орбана Петер Мадзяр - ЕС зойме пазіцыю чакання. Калі Орбана перавыберуць - пачнецца «сур’ёзная размова» паміж краінамі блока пра далейшыя дзеянні.

«Гэта, несумненна, будзе мець наступствы пасля выбараў. Мы проста чакаем, калі гэта адбудзецца», - сказаў адзін з дыпламатаў.

Цяпер ЕС разглядае прывязку фінансавання да больш строгіх умоваў захавання вяршэнства права.

Лідары стаяць перад выбарам: зняць пытанне крэдыту з парадку дня і раззлаваць Зяленскага - або ісці на канфрантацыю з Венгрыяй і выглядаць так, быццам падвяргаюцца шантажу.

«Калі мы не зможам дамагчыся прадастаўлення крэдыту, Зяленскі, цалкам слушна, будзе ў лютасці», - прызнаў адзін з дыпламатаў.

Што адбылося

Орбан скарыстаўся пашкоджаннем нафтаправода «Дружба» ў студзені, каб заблакаваць крэдыт для Украіны. Гэта парушэнне ўласнага слова, дадзенага лідарам ЕС, і адначасова зручная нагода для перадвыбарчай кампаніі.

Паралельна венгерскі прэм’ер затрымліваў браніраваны канвой з украінскім золатам і публікаваў відэа з заявамі пра пагрозы яго сям’і з боку Украіны.

Дарэчы, былы дэпутат ад «Фідэс» Жужанна Селені лічыць, што ён здольны справакаваць канстытуцыйны крызіс або абвясціць надзвычайнае становішча, каб ускладніць фармаванне новага ўрада.

Паводле яе слоў, калі апазіцыя атрымае толькі простую большасць - Орбан будзе мець дастаткова інструментаў, каб фактычна заблакаваць працу парламента.

Эксперты кажуць: Орбан, хутчэй за ўсё, не будзе заяўляць напрамую пра фальсіфікацыі - гэта пашкодзіць яго шанцам на вяртанне. Затое будзе аспрэчваць вынікі ў асобных акругах і падштурхоўваць прыхільнікаў да пратэстаў.