У Літву прыехала частка вызваленых палітвязняў

• 19.03.2026, 23:02

У іх няма пашпартоў.

У Літву прыехала частка вызваленых палітвязняў — 15 з 250 чалавек. Сярод іх Кацярына Бахвалава, Эдуард Пальчыс, Валянцін Стэфановіч, Мікіта Залатароў і іншыя.

Праваабаронца Валянцін Стэфановіч распавёў, што з калоніі ў Магілёве ў Мінск яго везлі з шапкай на вачах і з кайданкамі на руках. У праваабаронцы забралі ўсе яго рэчы, у тым ліку абутак, і выдалі новыя, перадае «Зеркало».

— Раніцай нас забралі, вывезлі. Яшчэ сёння зранку я быў у турме [у СІЗА], — сказаў Стэфановіч.

Кацярына Бахвалава падзякавала ўсім, хто меў дачыненне да вызвалення.

Мікіта Залатароў распавёў, што нават не здагадваўся, што яго вызваляюць.

— Толькі калі павезлі да мяжы, я быў у разгубленасці. Першапачаткова мне ўвогуле сказалі, што да мяне прыехаў пракурор. Гэта ўсё цяжка, усім дзякуй за ўсё, — распавёў Залатароў.

Нагадаем, 19 сакавіка на волю з калоніі выйшлі 250 палітвязняў. 15 з іх накіравалі ў Літву, 235 засталіся ў Беларусі. Гэта адбылося пасля таго, як спецпасланнік прэзідэнта ЗША Дональда Трампа па Беларусі Джон Коул сустрэўся ў Мінску з Аляксандрам Лукашэнкам.

Па выніках перамоваў ЗША здымаюць санкцыі з «Белінвестбанка», Банка развіцця і Міністэрства фінансаў.

У вывезеных у Літву вызваленых вязняў няма пашпартоў.