Іран адмовіўся ад перамоваў з ЗША

• 2.03.2026, 8:18

Пра гэта заявіў сакратар Савета бяспекі Ірана.

Іран не будзе весці перамовы са Злучанымі Штатамі. Пра гэта на сваёй старонцы ў сацыяльнай сетцы X напісаў сакратар Вышэйшага савета нацыянальнай бяспекі краіны Алі Ларыджані.

«Мы не будзем весці перамовы са Злучанымі Штатамі», — напісаў Ларыджані.

Такім чынам палітык пракаментаваў інфармацыю газеты The Wall Street Journal пра тое, што Ларыджані нібыта перадаў праз Аман сігнал Вашынгтону аб аднаўленні дыпламатычных кансультацый.

Раніцай 28 лютага ЗША разам з Ізраілем пачалі ваенную аперацыю супраць Ірана. Трамп у звароце да нацыі растлумачыў амерыканскія і ізраільскія ўдары па Іране «вычарпаным цярпеннем» у сувязі з нежаданнем Тэгерана адмовіцца ад ядзерных амбіцый.

У Ісламскай Рэспубліцы былі атакаваныя многія гарады, у тым ліку сталіца. Адзін з удараў прыйшоўся на рэзідэнцыю Вярхоўнага лідара Алі Хаменеі, ён не выжыў. У адказ Іран нанёс удар ракетамі і беспілотнікамі па Ізраілю і па амерыканскіх ваенных базах на Блізкім Усходзе.