Навошта станцыі метро ў Мінску пазначаюць нумарамі

• 2.03.2026, 13:55

Як іх расшыфраваць.

Мінскі метрапалітэн праліў святло на яшчэ адну сваю загадку і расказаў, як уладкавана нумарацыя станцый і чаму яна пачынаецца з дзясяткаў.

Кожная станцыя метро мае трохзначны нумар. Напрыклад, 117. Першая лічба паказвае на лінію: 1 – Маскоўская, 2 – Аўтазаводская, 3 – Зялёналужская.

Наступныя дзве — парадкавы нумар станцыі на гэтай лініі. Так, 17 азначае, што гэта сямнаццатая станцыя па ліку на першай лініі. Адлік на Маскоўскай лініі вядзецца ад «Малінаўкі», на Аўтазаводскай — ад «Магілёўскай», на Зялёналужскай — ад «Слуцкага Гасцінца».

Але чаму нумарацыя пачынаецца з 110, 210, 310, а не з 101, 201, 301? Гэта зроблена з запасам на будучыню. Калі-небудзь, калі за «Малінаўкай», «Магілёўскай» або «Слуцкім Гасцінцам» з’явяцца новыя станцыі, іх можна будзе пранумараваць па парадку, не змяняючы ўжо існыя нумары. Так сістэма застаецца гнуткай і не патрабуе перагляду пры кожным пашырэнні метрапалітэна.

Нумар станцыі ўніверсальны: яго лёгка распазнаць на мапе, у мабільным дадатку і пачуць у аб’яве па гучнай сувязі. Для замежнікаў, якія не могуць запомніць складаных назваў, лічба становіцца выратавальным арыенцірам. А ў экстранай сітуацыі нумар назваць значна хутчэй і прасцей, чым доўгую назву.

Такім чынам, нумары станцый робяць метро больш зразумелым і зручным для ўсіх пасажыраў — ад турыстаў да карэнных жыхароў. Гэта незаўважная, але важная дэталь навігацыі, якая дапамагае мільёнам людзей не губляцца ў падземцы.