У Беларусі фіксуюць рост вады ў рэках пасля таяння лёду

• 2.03.2026, 17:54

Пад’ём на асобных адрэзках дасягае 17 сантыметраў за суткі.

На большасці рэк Беларусі спецыялісты Белгідрамета канстатавалі павышэнне ўзроўняў вады, выкліканае таяннем і разбурэннем лёду.

Паводле інфармацыі гідролагаў, у перыяд з 28 лютага па 1 сакавіка адбылося ўскрыццё Заходняй Дзвіны каля Віцебска, а таксама Віліі каля аграгарадка Стэшыцы. «Поўнасцю ачысцілася ад ледзяных утварэнняў Вілія ў г. Вілейка, а таксама некаторыя прытокі Заходняга Буга, Сожа і Прыпяці», — паведамілі спецыялісты.

Па стане на 2 сакавіка на большасці рэк басейнаў Заходняй Дзвіны, Нёмана, Дняпра, Бярэзіны, Сожа і Прыпяці, а таксама на буйных вадасховішчах (Вілейскае, Чыгірынскае, Салігорскае, Заслаўскае, Чырвоная Слабада) і азёрах (Нарач, Дрывяты, Чырвонае і Лукомскае) захоўваўся ледастаў. Таўшчыня лёду вагаецца ад 10 да 45 сантыметраў.

«Лёд тае на месцы, яго структура змяняецца, павялічваюцца палоніны, закраіны і расколіны, адзначаецца вада на лёдзе», — удакладнілі ў Белгідрамеце.

Спецыялісты таксама паведамілі, што на рэках басейнаў Заходняй Дзвіны, Нёмана, Дняпра, Бярэзіны, Прыпяці і Заходняга Буга назіраецца пераважна павышэнне ўзроўняў вады. Інтэнсіўнасць павышэння складае ад 1 да 17 сантыметраў за суткі. Аднак на рэках басейнаў Віліі і Сожа, згодна з дадзенымі, пераважае спад.