Якой будзе сёлета вясна ў Беларусі

• 2.03.2026, 20:33

Сіноптыкі зрабілі прагноз.

Сіноптыкі далі папярэдні прагноз, якой сёлета будзе вясна ў Беларусі. Ці варта чакаць чарговай порцыі тэмпературных анамалій і, калі так, у які бок гэтым разам хіснецца маятнік — ці надоўга затрымаецца зіма, ці лета прыйдзе раней за тэрмін?

Папярэдні прагноз на ўвесь вясновы сезон далі аўтары тэматычнага Telegram-канала @nadvorie. Для гэтага яны прааналізавалі вынікі 50 запускоў адной і той жа кліматычнай мадэлі — брытанскай Unified Model ад METOFFICE. Кожны раз мадэль запускалі з крыху адрознымі зыходнымі данымі і назіралі за тым, як унесеныя змены ўплывалі на прагноз мадэлі, а пасля абагульнілі атрыманыя даныя.

У выніку атрымаліся наступныя карты з прагнозам тэмпературных анамалій на сакавік—май 2026 года. Дакладных тэмпературных значэнняў у °C кліматычная мадэль не прыводзіць, а толькі дае агульнае ўяўленне пра імавернасць таго, што тэмпература трапіць у адну з трох катэгорый адносна кліматычнай нормы.

Зыходзячы з вынікаў аналізу, аўтары Telegram-канала прыйшлі да высновы, што сакавік 2026 года абяцае больш цёплае, чым звычайна, надвор'е для паўднёва-захаду Беларусі, але для большай часткі тэрыторыі краіны надвор'е будзе блізкае да кліматычнай нормы. А яна, паводле шматгадовых даных Белгідрамета, у сярэднім складае +0,8°С.

Красавік гэтага года, паводле даных аналізу, будзе «нармальным» (кліматычная норма паводле Белгідрамета за перыяд 1991–2025 гадоў складае +7,8°С).

А вось у маі верагоднасць больш цёплых тэмператур ужо вышэй. Калі ўлічыць, што кліматычная норма апошняга вясновага месяца паводле Белгідрамета складае +13,4°С, гэта сведчыць пра тое, што прынамсі канец вясны парадуе беларусаў прыемным цёплым надвор'ем.

Тым часам у Міністэрстве па надзвычайных сітуацыях (МНС) пачалі актыўную падрыхтоўку да вясновай паводкі. У рэгіёнах, якія, паводле папярэдніх разлікаў спецыялістаў, гэтай вясной могуць апынуцца ў зоне падтоплення, пачалі ўзводзіць ахоўныя дамбы, а карыстальнікі сацсетак наглядна паказалі, што ў некаторых раёнах беларускага Палесся вялікая вада ўжо пачала падбірацца да жылых дамоў.