МАРТ узяўся за буйны агрэгатар таксі

• 20.03.2026, 12:05

Яму вынеслі папярэджанне.

Міністэрства антыманапольнага рэгулявання і гандлю вынесла папярэджанне аднаму з буйных сэрвісаў таксі, паведамілі ў прэс-службе ведамства.

Ідзе гаворка пра кампанію «БелГо Корп», якая займае дамінуючае становішча на рынку паслуг па арганізацыі пасажырскіх перавозак на таксі ў Мінску і Мінскім раёне. Паводле звестак МАРТ, кампанія без дастатковых падстаў адмовілася заключыць дамову з ТАА «Тандем Драйв» на падключэнне да сэрвісу «Яндекс Go».

У ведамстве адзначылі, што ў агрэгатара не было эканамічных або тэхналагічных прычын для такога рашэння. У сувязі з гэтым у яго дзеяннях убачылі прыкметы парушэння антыманапольнага заканадаўства. Для прадухілення магчымых парушэнняў кампаніі вынесена афіцыйнае папярэджанне.