Беларусам, якія плануюць падаваць дакументы на від на жыхарства ў Польшчы, варта ўлічыць важны момант

• 20.03.2026, 22:50

Неўзабаве запрацуе новы партал MOS.

Давераны профіль (Profil zaufany ePUAP) будзе неабходны для падачы заявы на атрыманне віду на жыхарства ў Польшчы праз новы партал MOS, папярэдзілі ва Упраўленні ў справах замежнікаў. Партал павінен запрацаваць у бліжэйшы час і перавесці ў электронную форму працэдуры легалізацыі, піша Most.

Давераны профіль ePUAP — гэта спосаб пацвярджэння асобы ў інтэрнэце. З яго дапамогай можна падпісваць дакументы ў электронным выглядзе (тады подпіс прыраўноўваецца да ўласнаручнага) і вырашаць адміністрацыйныя пытанні анлайн. З дапамогай даверанага профілю можна, напрыклад, падаць заяву на атрыманне дапамогі, увайсці ў анлайн-кабінет пацыента, праверыць штрафныя балы за кіраванне, зарэгістравацца ў сістэме для падачы падатковай дэкларацыі, атрымаць даведку аб несудзімасці ў Польшчы і многае іншае.

Профіль ствараецца бясплатна. Зарэгістраваць яго можа любая фізічная асоба, якая мае нумар PESEL. Кожны чалавек можа мець толькі адзін давераны профіль. Каб стварыць профіль, трэба прайсці верыфікацыю, напрыклад праз інтэрнэт-банкінг, падчас відэасувязі з чыноўнікам або пры асабістым наведванні дзяржаўнай установы.

У Упраўленні ў справах замежнікаў папярэдзілі, што даныя для ўваходу ў давераны профіль (login.gov.pl) нельга нікому перадаваць, бо гэта можа паставіць пад пагрозу бяспеку карыстальніка.