МЗС Беларусі завыў з-за адключэння ў ЕС картак Visa трох беларускіх банкаў

• 21.03.2026, 11:40

Лукашэнкаўскія чыноўнікі скардзяцца на санкцыі.

Рашэнне плацежнай сістэмы Visa аб адключэнні ў ЕС картак трох беларускіх банкаў з'яўляецца «тыповым прыкладам з'явы празмернага прымянення санкцый». Пра гэта заявіў часовы павераны ў справах Беларусі пры ЕС Сяргей Панасюк, піша «Зеркало».

«Працягваем настойваць на незаконнасці абмежавальных мер, не ўхваленых Саветам Бяспекі ААН. Але нават калі не ўлічваць гэты аспект, то санкцыі ЕС сёння — гэта абсалютна заблытаны непразрысты інструмент, які прымяняецца не толькі супраць Беларусі, але і ў дачыненні да дзясяткаў краін, у якім ужо не разбіраюцца нават самі еўрапейскія чыноўнікі. Празмернае прымяненне санкцый выклікае асаблівую занепакоенасць, паколькі на практыцы не працуюць, у прыватнасці, гуманітарныя выключэнні, і санкцыі становяцца проста негуманным бязразборным каральным інструментам Бруселя ў дачыненні да непажаданых краін», — заявіў дыпламат.

Нагадаем, 19 сакавіка «Белаграпрамбанк», «Альфа-Банк» і «Белгазпрамбанк» папярэдзілі сваіх кліентаў, што з 18 сакавіка іх карткі Visa перасталі працаваць у краінах Еўрасаюза, а таксама ў Ісландыі, Ліхтэнштэйне, Нарвегіі. У «Альфа-Банку» звязвалі гэтае абмежаванне з санкцыямі.