Расія пашырае сакрэтную авіябазу каля Масквы

• 21.03.2026, 11:48

З'явіліся звесткі спадарожнікавай разведкі.

Расіяне пачалі маштабнае будаўніцтва ангараў на аэрадроме Раменскае, дзе базуюцца стратэгічныя бамбавікі Ту-160 і Ту-95МС.

Аб гэтым паведамілі на старонцы AviVector у X, дзе выкладваюць звесткі спадарожнікавай разведкі авіябаз. Там паказалі фота аэрадрома Раменскае.

Аўтар адзначае, што на аэрадроме Раменскае пад Масквой зафіксавана ўзвядзенне новых ангараў і пашырэнне стаянак для самалётаў Ту-160, Ту-95МС і Ту-22М3, якія з'яўляюцца носьбітамі ядзернай зброі і ракет для удараў па Украіне.

Згодна са здымкамі станам на 15–19 сакавіка 2026 года, актыўныя работы вядуцца ў цэнтральнай і паўднёвай частках авіябазы.

На спадарожнікавых здымках бачна, што ў цэнтры аэрапорта пачаты мантаж збудаванняў памерам 110 на 77 метраў. Такія габарыты дазваляюць поўнасцю схаваць стратэгічныя ракетаносцы ад візуальнага назірання і абараніць іх ад асколачных паражэнняў.

Акрамя таго, у паўднёвай частцы аэрадрома заўважана падрыхтоўка новых пляцовак для базіравання бортаў. Аналагічныя работы раней фіксаваліся на авіябазе «Энгельс-2» у Саратаўскай вобласці.

На тэрыторыі ўжо ўсталяваныя будаўнічыя вагончыкі і склады для матэрыялаў.

Таксама даследчыкі AviVector ідэнтыфікавалі прысутнасць асноўных сіл стратэгічнай авіяцыі ворага:

Ту-160 («Белы лебедзь»): 3 адзінкі (адзін з бортаў у перыяд 18–19 сакавіка быў перамешчаны або пакінуў аэрадром).

Ту-95МС: 1 адзінка.

Ту-22М3: 1 адзінка.

Аэрадром «Раменскае» мяжуе з горадам Жукоўскі і аднайменным міжнародным аэрапортам, што робіць гэты вайсковы аб'ект часткай буйнага авіяцыйнага вузла каля расійскай сталіцы.