Кубу другі раз за тыдзень ахапіла маштабнае адключэнне электраэнергіі

• 22.03.2026, 9:07

Больш за 10 млн чалавек засталіся без святла.

Міністэрства энергетыкі Кубы ў суботу ўвечары, 21 сакавіка, заявіла пра чарговае адключэнне электраэнергіі па ўсім востраве.

Пра гэта паведамляе CNN.

«А 18:32 (па мясцовым часе) адбылося поўнае адключэнне Нацыянальнай электраэнергетычнай сістэмы. Задзейнічаны пратаколы па аднаўленні яе функцыянавання», — заявілі ў міністэрстве.

У выніку інцыдэнту больш за 10 млн чалавек засталіся без святла. Незадоўга да гэтага дзяржаўная энергетычная кампанія краіны заявіла, што чакае дэфіцыт электраэнергіі ў памеры 1,7 мегавата ў самы пікавы перыяд у суботу ўвечары.

Зазначым, што Куба ўсё яшчэ аднаўлялася пасля таго, як ЗША пачалі блакаваць пастаўкі паліва з Венесуэлы на пачатку гэтага года.

CNN адзначае, што недахоп нафты з Мексікі і Венесуэлы практычна цалкам спыніў турызм на востраве, парушыў адукацыйны працэс, скараціў працу бальніц і не дазваляе фермерам дастаўляць сваю прадукцыю на рынак.