Украінскія аператары дронаў знішчылі тры расійскія ЗРК «Тор-М2» за пяць дзён
- 22.03.2026, 11:59
Ваенныя эксперты патлумачылі, аб чым гэта сведчыць.
За 5 дзён баявых дзеянняў – з 12 па 16 сакавіка – аператары 413-га палка Сіл беспілотных сістэм «Рэйд» паразілі тры расійскія ЗРК «Тор-М2». Два з іх – на часова акупаванай тэрыторыі Запарожскай вобласці.
Выданне Defense Express прааналізавала гэтыя эпізоды і адзначыла, што такі тэмп страт тэхнікі з'яўляецца даволі высокім для расійскіх акупацыйных войскаў. Паводле стану на 2025 год армія РФ мела ўсяго 120 комплексаў «Тор» розных мадыфікацый.
Аўтар адзначыў, што ў першых двух выпадках паражэння варожых ЗРК удары былі нанесеныя беспілотнікамі кампаніі Fire Point. Да таго ж, на абнародаваных кадрах не відаць ніякіх спробаў ворага змяніць пазіцыю або збіць украінскія дроны.
«Апісанае вышэй сведчыць, у прыватнасці, пра тое, што вытворчасць і перадача ў войскі дронаў-камікадзэ ад Fire Point (тыпаў FP-1 і FP-2) выйшлі на дастаткова высокія тэмпы. Таму такія сродкі цяпер могуць выкарыстоўвацца не толькі для паражэння важных аб'ектаў у тыле акупацыйных войскаў, але і супраць больш шырокага пераліку важных мэт, такіх як, у прыватнасці, варожыя сродкі СПА», — гаворыцца ў матэрыяле.
Што да лакалізацыі паражэння расійскіх комплексаў, аўтар мяркуе, што цяпер акупанты вымушаныя перабудоўваць канфігурацыю сваёй сістэмы супрацьпаветранай абароны на часова акупаваных тэрыторыях Украіны. Вораг спрабуе вырашыць адразу дзве задачы – прыкрыць важныя для сябе аб'екты, адначасова перакрываючы шляхі праходу украінскіх дронаў для удараў ужо па аб'ектах на тэрыторыі Расіі.
«Ну і урэшце – што, нягледзячы на распаўсюджаныя ў сацыяльных сетках сцвярджэнні, усе складнікі групоўкі СБС, у прыватнасці 413-ы полк СБС «Рэйд», вядуць працу не толькі на пярэднім краі абароны ворага для знішчэння жывой сілы, але і на ўсю даступную глыбіню ад лініі баявога судакранання», — рэзюмуе выданне.