Пад Мінскам на вачах у ратавальнікаў рыбак раптоўна праваліўся пад лёд у пяці метрах ад берага

• 22.03.2026, 14:19

Яго ўдалося выратаваць.

У Мінскім раёне ратавальнікі выцягнулі рыбака, які праваліўся пад лёд. Яго заўважылі падчас прафілактычнага рэйду МНС, паведамляе прэс-служба ведамства.

Інцыдэнт адбыўся на Слаламным канале каля вёскі Сёмкаў Гарадок. Супрацоўнікі МНС праводзілі мерапрыемствы па папярэджанні няшчасных выпадкаў на вадзе і заўважылі, як мужчына прыкладна ў пяці метрах ад берага раптоўна пайшоў пад лёд.

Ратавальнікі хутка адрэагавалі і з дапамогай вяроўкі выцягнулі яго з вады. Як адзначылі ў МНС, важную ролю адыграла тое, што рыбак быў у выратавальнай камізэльцы — дзякуючы гэтаму ён змог трымацца на паверхні.

Медыцынская дапамога мужчыне не спатрэбілася.