Кантрабандныя шары з Беларусі сарвалі працу Вільнюскага аэрапорта

• 22.03.2026, 16:31

Літва разглядае інцыдэнт як элемент гібрыднай пагрозы з боку Мінска.

Вільнюскі аэрапорт у ноч на 22 сакавіка часова спыняў працу з-за выяўлення ў паветранай прасторы аб’ектаў, падобных да кантрабандных паветраных шароў.

Як паведамляе LRT са спасылкай на Літоўскія аэрапорты, абмежаванні былі ўведзеныя а 1:33 па мінскім часе пасля фіксацыі навігацыйных пазнак, якія ўяўлялі пагрозу для авіяцыі. Праз крыху больш за гадзіну — а 2:46 — паветраная прастора была адкрытая, і аэрапорт аднавіў працу.

Абмежаванні закранулі як мінімум тры рэйсы. Прадстаўнікі аэрапорта папярэдзілі, што ў нядзелю і панядзелак магчымыя асобныя затрымкі з-за парушанай ратацыі экіпажаў і самалётаў. Пасажырам, чые рэйсы былі адмененыя або затрыманыя, раяць звяртацца непасрэдна ў авіякампаніі.

Гэта ўжо чацвёрты выпадак у гэтым годзе, калі праца Вільнюскага аэрапорта парушаецца з-за пагрозы кантрабандных паветраных шароў. Раней падобныя абмежаванні ўводзіліся на мінулым тыдні і працягваліся каля 15 хвілін.

З пачатку 2026 года ў Літве ўжо перахапілі 45 метэаразондаў з цыгарэтамі, што прыляцелі з Беларусі. З іх 29 былі зафіксаваныя ў студзені, а 16 — за дзве тыдні лютага. Агульны кошт гэтых цыгарэт складаў каля 540 тысяч еўра. Былі затрыманыя 22 чалавекі, звязаныя з паветранай кантрабандай цыгарэт.

У 2025 годзе памежнікі затрымалі 171 чалавека, падазраванага ў датычнасці да кантрабанды. Таксама летась перахапілі 635 партый цыгарэт, якія перакідвалі ў Літву паветранымі шарамі.

Улады Літвы разглядаюць запуск такіх шароў як элемент гібрыднай атакі з боку Мінска. У снежні мінулага года ў краіне была абвешчаная надзвычайная сітуацыя ў сувязі з гэтай пагрозай, а ў кастрычніку часова закрывалася мяжа з Беларуссю.