ЗША паскараюць разгартаванне войскаў на Блізкім Усходзе

• 23.03.2026, 10:16

Падрыхтоўваецца штурм вострава Харг.

Амерыканскія чыноўнікі папярэдзілі Ізраіль і іншых саюзнікаў, што ў ЗША можа не застацца іншага выбару, акрамя як пачаць наземную аперацыю па захопе іранскага вострава Харг. Пра гэта 22 сакавіка паведаміла The Jerusalem Post са спасылкай на крыніцы.

Востраў Харг адыгрывае ключавую ролю ў сусветным гандлі нафтай — праз яго праходзіць каля 90% экспарту іранскай сырай нафты.

Паводле дадзеных СМІ, апошнія дні ў адміністрацыі ЗША вяліся абмеркаванні мэтазгоднасці акупацыі Харга, каб прымусіць Іран спыніць блакіроўку суднаходства праз Армузскі праліў.

Суразмоўцы выдання адзначылі, што амерыканскія вайскоўцы ўжо паскорылі разгартаванне тысяч марскіх пяхотынцаў і караблёў ВМС ЗША на Блізкім Усходзе.

У складзе сіл — група баявой гатоўнасці USS Boxer, якая ўключае дэсантавы карабель USS Boxer, які выкарыстоўваюць як лёгкі авіяносец, а таксама транспартныя дэсантавыя судны USS Portland і USS Comstock. На гэтых трох караблях знаходзяцца каля 4,5 тыс. марскіх пяхотынцаў і дадатковы баявы персанал, піша The Jerusalem Post.