Еўракамісар: За кожным міграцыйным крызісам у ЕС стаіць Пуцін

• 23.03.2026, 13:04

У Бруселі ўказалі на ролю Крамля ў павелічэнні патоку бежанцаў.

Нелегітымны прэзідэнт краіны-агрэсара РФ Уладзімір Пуцін з'яўляецца «галоўнай рухаючай сілай» міграцыі ў Еўропу з-за сваёй ролі ў распальванні канфліктаў за апошняе дзесяцігоддзе. Пра гэта заявіў камісар ЕС па ўнутраных справах і міграцыі Financial Times.

Заява чыноўніка ЕС прагучала на фоне падрыхтоўкі блока да верагоднага росту патоку бежанцаў з Блізкага Усходу.

Бруннер заявіў, што за вялікімі міграцыйнымі патокамі стаіць нелегітымны прэзідэнт РФ. «Гэта заўсёды Уладзімір Пуцін», — сказаў ён.

Еўракамісар нагадаў пра падтрымку Пуціным былога прэзідэнта Сірыі Башара Асада, які збег у РФ у канцы 2024 года, на працягу ўсёй грамадзянскай вайны, што пачалася ў 2011 годзе.

Ваенныя дзеянні ў Сірыі справакавалі міграцыйны крызіс у Еўропе. Як пішуць СМІ, у 2015–2016 гадах больш за 2 млн чалавек падалі заявы аб прадастаўленні прытулку ў краінах ЕС.

Другі міграцыйны паток у Еўропу адбыўся з-за поўнамаштабнага ўварвання РФ ва Украіну. Паводле слоў Бруннера, часовую абарону ў ЕС надалі каля 4,3 млн украінцаў.

Што да вайны ў Іране, то, як адзначыў Бруннер, нават калі яе не пачала Расія, Пуцін падтрымаў рэжым аятолаў. Адпаведна, ён фактычна з'яўляецца галоўнай рухаючай сілай міграцыі ў Еўропу, лічыць камісар.

СМІ пішуць, што, у адрозненне ад 2015 года, калі былая канцлерка Германіі Ангела Меркель прымала бежанцаў з Сірыі, цяпер еўрапейскія краіны імкнуцца прадухіліць масавы наплыў бежанцаў на фоне вайны на Блізкім Усходзе. Некалькі краін ЕС, у тым ліку Італія і Данія, настойваюць на закрыцці межаў.

У сумесным лісце прэм'ер-міністр Даніі Метэ Фрэдэрыксен і прэм'ер-міністр Італіі Джорджа Мелоні папярэдзілі, што «мы не можам рызыкаваць паўтарэннем патокаў бежанцаў і мігрантаў у ЕС, якія мы назіралі ў 2015–2016 гадах».