«Звычайна ўжо з раніцы было 60 чалавек»

• 23.03.2026, 17:44

Яшчэ адна чарга ў Мінску — за чым гэтым разам?

У Мінску пачаўся сезон продажу бярозавага соку. Кошт соку наўпрост ад лясніцтваў сёлета — 55 капеек за адзін літр (а ў крамах будзе ў разы даражэй). Чэргі ўжо з’яўляюцца, але пакуль не такія вялікія, як у мінулыя гады.

Чытач Onliner Юрый распавёў, што сок пачалі прадаваць у лясніцтве на вуліцы Баграціёна, 70. Літр каштуе 55 капеек.

— Я прыехаў з двума каністрамі па 10 літраў — заплаціў 11 рублёў. Сказалі, што продаж ідзе ўсяго другі дзень, сезон толькі пачаўся, — кажа ён.

Паводле слоў мінчука, людзі прыходзяць з вялікімі ёмістасцямі, каб запасціся сокам: бяруць пяцілітровыя бутэлькі, каністры і нават бочкі.

Юрый прыехаў удзень, каля 14:00, і чакаў убачыць доўгую чаргу, але людзей было няшмат.

— Было чалавек 10—20 максімум. Я пачакаў каля 20 хвілін, хутка набраў сок, разлічыўся і паехаў дадому, — распавёў ён.

Ён адзначае, што ў мінулыя гады сітуацыя выглядала інакш: у першыя дні продажу ўжо з раніцы збіралася па 50—60 чалавек — многія прыязджалі на аўтамабілях або грамадскім транспарце. Пакуль жа, нягледзячы на добрае надвор’е, ажыятаж застаецца ўмераным.

У Мінскім лясніцтве пацвердзілі, што бярозавы сок у іх ужо можна набыць — з 10:00 да 20:00, без перапынку на абед.